Asesinato cruel a ser cometi ayera nochi na Macuaria, Santa Cruz 

ORANJESTAD- Henter comunidad a keda conmovi ayera nochi, ora cu noticia a drenta primeramente, cu tres hende lo a muri den un candela di cas na Santa Cruz.
Sinembargo na e sitio e berdad a resulta di ta completamente otro na e cas situa na Macuarima 27-B na Santa Cruz, ora cu a bin Sali na cla cu ta un caso di asesinato a tuma lugar caminda a mata tres miembro di famia Lampe.
Na e sitio di crimen, La Prensa Aruba a wordo informa cu e tres victimanan tabata e conocido sr Juan Lampe, kende ta traha na Banco di Caribe y mihor conoci como Colai of Juancho di 60 anja, su esposa Aura Lampe-Geerman di 57 anja y nan jiu homber Edvard Lampe di 30 anja, kende ta masha conoci como locutor di Radio TOP FM di Santa Cruz.
Tur tres a ser haya morto riba vloer den un di e cambernan di e cas, cu herida y slanan fuerte na cabez mientras cu riba nan curpa, polisnan a bin haya carbon cu ta ser usa pa bbq, mientras cu nan curpa y den e camber tabata hole liquido pa sende bbq.
Pues tur cos tabata indica cu e autornan di e crimen horendo aki, lo a trata di sende e restonan mortal na candela, caminda un di e curpanan ya caba tabata mustra quemadura parcial.
Na e sitio di crimen tabata presente e otro jiu homber di e famia, esta Eugene Lampe, kende ta un conoci di polis y tame conoci di ta un drogadicto, y kende aparentemente mesora a avisa autoridadnan, cu ta su persona a comete e acto cruel aki cu su famia.
GRAN INTERES
Mesora cu e noticia bira conoci, centenares di curioso a tuma rumbo pa e adres menciona, tratando di confirma si e horendo noticia aki tabata berdad of no, y a bin resulta cu enberdad Aruba a sera conoci c’un caso conoci como multiple asesinato.
Te cu awe mainta ainda no por a confirma e momento cu Eugene a comete e crimennan aki, ya cu ta for di merida na momento cu e victima Edvard mester a presenta su programa di “Boca na Palabra” na TOP FM, e no a presenta na pia di trabou, y ora cu a trata di yam’e na telefon, e no a contesta of reacciona si e ta bin traha of no.
Algo despues di merdia, un colega di dje a bai na e cas cu ta keda na pariba di warda di Polis nobo na Santa Cruz pa mira si e por topa cu Edvard of haya sa di con e no a presenta na trabou pero no a haya ningun reaccion na e cas cu tabata sera.
Ayera nochi net na momento cu tabata birando scur, bisinjanan a tuma nota cu tin huma ta Sali for di e cas y a avisa autoridadnan di Cuerpo di Bombero, cu a bai na e sitio, drenta den e cas y a bin haya e descubrimento macabre aki.
Ta ora cu bomberonan a yega na e cas, nan a topa cu e ruman homber Eugene kende a core Sali for di e cas, indicando cu tin mas hende den e cas na candela.
Sinembargo e curpanan no a haya oportunidad pa kima y e ora bomberonan a bin descubri e curpanan tur mutiya y maltrata den un plaz grandi di sanger.
E curpanan lo tabatin marca di slanan fuerte na cabez y curpa y algun a wordo gekap c’un obheto skerpi, dunando indicacion cu e asesino a trata di corta e curpanan pa pida pida.
E sospechoso principal, Eugene Lampe di 29 anja, no a mustra ningun tipo di emocion para na e sitio cu autoridadnan policial y ora cu el a ser transporta for di e lugar di crimen pa warda di polis, tampoco el a duna senjal alguno cu e tin duele di e barbaridad cu el a comete contra di su famia.
CONMOCION
Te cu awe mainta ta reina un conmocion grandiden henter comunidad, ya cu no ta un situacion ta sa pasa akin a Aruba, cu tambe a conoce su crimennan atroz, pero nunca algo semehante.
Pa colmo el a sosode cu hendenan cu ta conoci como “bon hende” tanto na Santa Cruz como rond Aruba pa esnan cu conoce tanto Juancho como su famia.
E hoben Edvard, dj na TOP FM, tambe ta conoci pa ta un hoben sumamente amabel, di bon manera y masha servicial y su morto a conmove tur hende rond di dje, sigur di su coleganan na radio emisora.
Eugene Lampe a keda deteni pa autoridadnan y a ser someti na interogacion riba loke a sosode pero te na ciere di e edicion aki, no tabatin informe riba e motibo di con el a bai over na comete e acto cruel aki, cu posiblemente lo por a sosode despues di 12’or di merdia di ayera.