Skina di Sorti, awe djasabra 5 di aprel di 2008, ta kuminsá ku deseá tur hende un bon dia. Segun siñansa, goberná ta nifiká mira dilanti. Konsekuentemente asina ku un gobièrnu ta kore tras di echo, ta reakshoná enbes di ta akshoná den kuadro di un plan, mester kalifiká e maneho ei den e parti di eskala denominá komo mediokre pa defisiente. Ku serka nos e maneho ta kai den e parti ei di e eskala no mester wòrdu atribuí na e kalidat òf intenshon di esnan di turno, pero na un kultura polítiko eratiko.
Ta masha difísil pa un aktor òf un grupito den e totalidat, kibra ku e kultura koriente, pasobra e “ruling majority” sea ta trèk bo bèk den e kuadro ku nan ta dikta (ambishon al final di kuenta ta tene e mayoria den liña) òf nan ta esforsá na hasi bo bida un invierno. Kambio den direkshon kultural no ta tuma lugá den forma pasífiko. E mester bai den forma drástiko pa medio di un revolushon (no nesesariamente unu akompañá ku violensia).
Surgimentu di respektivamente MAN i PAR mester wòrdu konsiderá komo revolushon. E kultura polítiko ku den inisio e respektivo organisashon polítikonan aki a presentá, tabata representá kambio supstansial den e direkshon ku práktika polítiko tabata tin. MAN Limpi den gobernashon i Ruime op de Boel, básikamente a pretendé e mesun kos. Implementashon di un kultura di gobernashon diferente.
Ku den práktika, tantu MAN komo PAR a bin brasa práktika polítiko tradishonal, tin di haber ku e echo ku ámbos organisashon a faya den maneho transishon den e nivel mental di e pueblo. Bo no por realisá un kambio den práktika polítiko si bo no yega na un komunidat ku ta karg’é. Ta p’esei, e echo ku mi ta konstatá ku segun un apresiashon ophetivo, e maneho no por wòrdu konsiderá adekuado, no ta nifiká ku mi ta konsiderá ku e bon intenshon no tei.
Realidat di momentu ta ku gobièrnu i sigur Bestuurscollege no a antisipá riba e desaroyonan ekonómiko global. Na momentu ku e impakto dje desaroyonan a provoká reakshon di Bestuurscollege, e akshonamentu di Bestuurscollege ta leu di esun indiká. E ta presis segun e polítika tradishonal ku PAR a bini pa kambia. E ta leu for di e vishon, determinashon i sentido di mishon ku gabinete Pourier-II a respira.
Tempu ku a bini ku e maneho di ahuste struktural esei tabata di antisipashon riba impaktonan ku komunidat no tabata persibí. Gobièrnu a asumí su responsabilidat i por bisa ku a drecha e dak promé ku mal tempu lo a yega. Te awe tin hopi ku no sa òf no ke sa, ta kiko tabata kologá riba kabes dje komunidat antiano.
Ta bèrdat ku probablemente e areglonan ku Ulanda riba tèrmino korto lo por suavisá e impakto di e mal desishon di maneho ku Bestuurscollege tin den mente. Pero riba tèrmino media i largu plaso, e preis ta bini. Nos lo kai mas atras pa lokual ta kompetitividat. Nos ta bolbe kometé e fayo garafal di bai kontra di reglanan básiko di e sistema di merkado liber.
E informashonnan ku ta sirkulá den mundu finansiero ekonómiko, pa sigidornan di Skina di Sorti ya no por ta notisia. Ta basta tempu pasá mi a alerta ku kontrali na e promé proyekshonnan ekonómiko ku instansianan lokal a emití na final di 2007 i inisio di 2008, futuro serkano no ta briante, pero kubri pa nubianan basta skur.
Awor aki instansianan global ta den usa e palabra pisá di reseseshon pa lokual ta ekonomia merikano, miéntras ku presidente di Banko Sentral ulandes ta alerta ku e impakto di e krísis di krédito na Merka su envergadura total ainda no ta konosí. Lokual sí ta konosí kaba ta ku e lo impaktá ekonomianan oropeo negativamente. E skarsedat di komestibel ku tabata vislumbrá kaba a konsekuensia di impakto di ekonomianan di primeramente China i India, segun mi lo empeorá pa e krísis den mundu bankario.
Laga mi ripití un biaha mas, ku e akshon gubernamental apropiá no t’esun populista kaminda ta krea e persepshon ku ta trata di algu temporal ku por wòrdu atendé ku supsidio general di gobièrnu. Ku supsidio general mi ker men e tipo di medidanan general ku Bestuurscollege di Kòrsou a pretendé di introdusí. Bo no ta gana nada ku hasimentu di gobièrnu mas vulnerabel.
Laga nos no lubidá ku gobièrnu mes tambe ta un konsumidó. Si bo redusí su entradanan, pa definishon bo ta pone preshon riba e presupuesto di e respektivo departamentunan, a ménos ku bo ta operando den un situashon di abundansia. E akshon mester ta uni di “tering naar nering”. Gobièrnu mester transmití e mensahe ku oumento di kosto ta provoká ousteridat i esei ker men ku bo tin di pone prioridat.
Oumento di kosto universalmente ta tradusí su mes den kontrakshon temporal di ekonomia, ku ora ta trata di oumento struktural di gastu, ta terminá na momentu ku e situashon insentivá avansenan teknológiko ku ta kondusí na oumento di produktividat. Riba tèrmino korto esnan ku a hiba un maneho ménos apropiá i konsekuentemente ta ménos kompetitivo tin di retirá. Sin intervenshon molestioso di gobièrnu e mekanismo di merkado liber tin di ahustá sierto kostonan di produkshon.
Intervenshon di gobièrnu, ku oumento di kosto di labor (bou di preshon) ta e kos di mas malu ku por sosodé. Ta algu ku desgrasiadamente nos no ke siña for di historia di nos desaroyo ekonómiko. E faktor mas determinante riba nivel di kosto na Kòrsou tabata kosto di labor. Na diferente okashon tabata tin spiralnan inflatorio ku a inisiá den i rondó di instansianan gubernamental.
Na Kòrsou tin gruponan vulnerabel ku lo mester di sosten, pero esaki no mester ta e motibu pa un gobièrnu (pa kolmo unu bashí, yen di debe ku ainda no a keda resolvé) introdusí medidanan general ku ta supsidiá esnan ku mas bien ker mantené un nivel di bida ku simplemente no ta sostenibel ku e desaroyonan ekonómiko global. Tal bes e situashon no a penetrá serka e mayoria pasobra gobièrnu ta transmití e mensahe ku no tin motibu pa preokupashon.
Mensen, awor mas ku nunka e mensahe mester ta ku ta ku “bloed, zweet en tranen” so ta rekuperá pais. No ta eksistí solushon sin doló. Semper bai solushon “too good to be true” ta resultá den “ a happy few and misery for the crowd”. Ta manera wega di piramit, un grupito ta yena saku riba kustia di demas.
Skina di Sorti ta ripití ku nos meta ta di fomentá un desaroyo di pensamentu kritiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.