WILLEMSTAD - E eksperto rekonosé mundialmente riba e tereno di pronóstiko di Orkan, William Gray di Colorado State University, a bisa ku e próksimo temporada lo ta mas drùk ku normal. Tur kos ta indiká ku e lo bai subi su pronóstiko pa temporada 2008 na 13 tormenta tropikal i shete orkan.
Segun Gray, e kondishonnan di laman mas friu okashoná pa La Niña den Pasífiko i temperaturanan mas haltu na superfisie di laman den Atlántiko ta kontribuyendo pa hasi e kondishonnan mas faborabel pa aktividat di orkan.
“Nos ta spera un temporada mas aktivo ku normalmente,” asina Gray a deklará. “E pregunta grandi ta si nos ta bai oumentá e sifra di lokual nos a pronostiká na desèmber. Nos lo por hasi esaki. En todo kaso nos lo no bai redusí e numbernan.”
Un temporada normal di orkan di seis luna ta produsí normalmente seis orkan i 10 tormenta tropikal. Na 2005 a generá un total rèkòrt di 15 orkan ku a inkluí entre otro Katrina i Rita i a okashoná biónes di dollar na daño i a mata alrededor di 1500 hende.
Temporada 2007 a produsí 14 tormenta tropikal di kual seis a haña forsa di orkan.
E ekipo di Colorado State University ta hasi nan pronóstikonan na vários okashon durante di aña. Na desèmber nan a pronostiká ku e temporada 2008 ku ta kuminsá 1 di yüni lo produsí 13 tormenta tropikal di kual shete lo bira orkan i tres lo ta di kategoria pisá ku bientunan di mas ku 178 kilometer pa ora.
E pronóstikonan di Colorado State a faya den último tres aña. Lo hasi e siguiente pronóstiko dia 9 di aprel próksimo durante un konferensha na Bahamas. Gray a hasi su promé pronóstiko na 1984.
E tormentanan fuerte a hala hopi atenshon di e merkadonan di petroli, kompanianan di seguro i otronan pa motibu di e impakto ekonómiko riba Golfo di Mexico i e produkshon di krudo i e dañonan kuantioso ku nan ta okashoná na edifisionan i plantashonnan.
Ekspertonan di orkan ta kere ku Atlántiko ta den un era ku hopi aktividat di orkan kuminsando for di alrededor di 1995 i ku lo por dura 40 aña. Algun, no ta inkluí Gray, ta kere ku kalentamentu mundial lo por ta e kousa pa orkannan mas poderoso.
“E superfisie di temperatura di laman partikularmente pafó di kosta di Iberia i Nortwèst Afrika, ta kayente meskos ku tabata na 1995 i 2005, añanan ku tabatin un temporada hopi aktivo,” Gray a bisa.
Orkannan ta haña forsa den lamannan mas kayente.