WILLEMSTAD – “Fatum Pensioen & Bedrijven Dag” tabata kompletamente den esfera di e desaroyo di rekursonan humano (Human Capital) komo instrumento pa konstruí un bon struktura ekonómiko”, asina Steven Martina, gerente direktor di Fatum Caribbean, a bisa.
T’esei ta e faktor tantu importante den produkshon i produktividat. Sin un tim di empleado bon motivá kompanianan kasi no por funshoná ku éksito. Ta e hende ta sentral den e proseso i ta e hende ta esun ku lo hasi e diferensia, loke ta pone ku mester keda i sigui inbertí den hende. Invershonnan den sentido di training, edukashon, areglo di penshun lo tin efektonan sinergétiko. Ta ku invershonnan den rekurso humano lo por engrandesé e forsa di empleo pa asina influensiá ekonomia na un manera duradero. Invershon den hende ku benefisionan grandi pa tantu e individual komo e kompania lo sirbi interesnan general.
Naturalmente e tópiko di areglo di penshun ta sentral. Den e seminario tabatin hopi atenshon pa desaroyonan demográfiko engeneral pero spesífikamente tambe e kambionan i konsekuensianan pa penshun i tambe seguronan médiko den kaso ku no tuma akshon konkreto. Ekspertonan riba tereno di sistema di penshun a elaborá riba e materia i a sugerí direkshonnan pa un futuro sano pa loke ta trata penshun.
Lo no tabata kompleto si e struktura estatal nobo lo no wòrdu inkorporá den e tópikonan di e seminario di Fatum. E struktura estatal nobo pa e pais indudablemente tin konsekuensianan pa invershonistanan, tantu individual komo pa kompanianan. Den esfera di seguridat i ambiente di trabou faborabel tambe lo tin hopi posibilidat pa inbertí den e personal, pues den Human Capital. Mas aleu a dediká atenshon na e desaroyonan den e sektor di turismo ta mustra invershonnan kuantioso ku ta sumamente importante den e ekonomia. Mas invershon den e sektor aki kemen mas kamber, loke tin komo konsekuensia hopi mas kupo di trabou. Tantu hotèlnan individual komo e organisashon di CHATA tin ròl krusial den e sektor i den invershonnan riba tereno di Human Capital.
Durante e seminario tabatin entrega di e Fatum Best in Business Award 2007 ku básikamente ta enserá un premiashon i stimulashon pa e empresario ku tin un bon struktura pa maneho di Rekursonan Humano, kaminda konkretamente ta inbertí den e personal. Desaroyo duradero lo wòrdu positivamente influensiá. Empresanan a manda nan datonan pa asina Fatum por a stimulá pa medio di un premio gordo gordo di dies mil florin. E premio aki a bai pa Café Barrista.
Kulminashon den e klousura di e Fatum Pensioen & Bedrijven Dag tabata momentu Jan van der Lubbe i Coen Hilgersom a wòrdu yamá dilanti pa risibí e promé edishon di “Fatum Pensioen Cahier”. Ámbos persona ta profeshonalnan grandi den e mundu di seguro i penshun anto ku lasonan fuerte ku Fatum. Ta trata di un kolekshon di tur tópiko riba e tereno di penshun ku Fatum a bin ta komuniká riba dje. Esei ku e meta pa konsientisá tantu kompanianan komo individualnan tokante e esensia di tin e penshun bon reglá.
Fatum, kasi un outoridat riba tereno di penshun, a pone den e Fatum Pensioen Cahier aki informashon fiho, informashon dinámiko, opinionnan di ekspertonan ku mira riba futuro i mas.