BOGOTA, Colombia, - Miles di colombiano a manifestá ayera n’e pais pa libertat pa mas ku 2.800 persona sekuestrá, bou di lema: “Nos tur ta Ingrid Betancourt”, kende ta den poder di gueria di FARC ya pa seis aña.
Pòtrètnan, frasenan i kantikanan di misa p’e eks kandidata presidensial a hala atenshon di e protesta nobo durante kua e colombianonan a hasi yamada pa libertat di esnan sekuestrá en general.
“Salba Ingrid Betancourt!”, por a lesa riba un pankarta enorme instalá na fachada di alkaldia di Bogotá, ubiká na Plaza de Bolívar, kaminda ta’tin mas o ménos 5.000 persona, apesar di áwaseru, segun kalkulashon di polisnan.
Na mesun ora, otro míles di manifestante, di akuerdo ku e organisadónan, a rekoré vários karetera prinsipal di e kapital colombiano i ademas personanan a sali na bentananan gritando, i tabata zuai lensunan blanku pidiendo “libertat, libertat, libertat” pa Betancourt i sobrá rehennan.
Betancourt tambe tabata presente riba imágen di T-shirtnan, pankartanan, posternan, kartonnan.
Imágen di Ingrid ku su kabes abou i hopi flaku publiká fin di aña pasá komo último prueba di bida, a dominá e marchanan.
N’e marchanan a uni Gloria Polanco, Clara Rojas i Jorge Eduardo Gechem, tres di seis rehen di FARC, librá na kuminsamentu di e aña’ki pa un desishon unilateral di e rebeldenan komo gesto pa Presidente venezolano Hugo Chávez.
“Awe nos tin kara di Betancourt, mañan lo bai ta kualke di e otro personanan sekuestrá i nos ta spera nan ku mannan habrí!”, Jorge Mejía a sigurá, kende ta kordinadó n’e siudat colombiano di Medellín di e grupo “Nos tur ta Ingrid”, ku ta buskando yama atenshon kontra e sekuestro.
Hopi hende muhé ku kabeinan largu i pretu, manera kabeinan di Ingrid Betancourt, a tapa nan kara ku pòtrèt di e dama polítiko colombiano-franses, i nan a bisti paña manera Ingrid pa karakteris’é.
“Mi ta spera ku mi presensia aki nan i tambe di mi kompañeranan, señora Ingrid haña sa ku nos no a lubid’é i e tin ku kuida su kurpa pa regresá serka su hendenan”, Amanda Campos a deklará na medionan di komunikashon lokal, kende ta un hóben universitario.
Segun vershon di kampesinonan di departamento selvátiko di Guaviare (situá 400 kilometer sùitost di Bogotá) i di vershon di un pastor katóliko di e region, Betancourt ta hopi malu, p’esei Fransia a manda un avion ambulans na Colombia, den un intento pa dun’é atenshon médiko.
Un di e manifestashonnan mas destaká a okurí na siudat di San José de Guaviare, kapital di e departamento ei, di kua e gobernador Oscar López a bisa den diskurso: “Nos ta apoyá e mishon médiko pa atendé Betancourt i sobrá personanan sekuestrá. Nos no ke risibí nan den kaha di morto!”
Apesar ku ainda no a duna balans riba kantidat di persona ku a sali manifestá, Prensa lokal a señalá ku e marcha di ayera no ta’tin asina hopi partisipante manera esun di 4 di febrüari kontra FARC ku miónes di manifestante, ni tampoko manera esun di 6 di mart, ora mas ku miónes a protestá kontra paramilitarnan di derecha.