Prof. Lorito Trua Trua mihó konosí komo Lorito ku su boka no sa para, ta yama tur hende un felis djasabra. Lorito ta di skohe pa e kaso ku a tuma lugá na Aruba kaminda un hòmber a mata su tata, mama i ruman. Un kaso ku sigur a kousa konsternashon na Aruba i mester pone hopi hende na Aruba para ketu pa loke ta tumando lugá realmente den sosiedat di isla.
****
Lorito ku sa di kiko e ta papia a tuma nota kaba ku pa basta aña e isla ta skondiendo su problemanan sosial serio. Lorito a atvertí nan na diferente okashon pa tuma nota di loke ta pasando, entre otro ku e fenómeno di chòler. Pero manera semper mester warda kosnan mas serio pasa pa despues tuma medida. Awor nos a haña un ehèmpel ku baka a hoga na pos. Forsa na komunidat di e isla i forsa na e famianan pa karga ku e tragedia aki.
****
Papiando di baka ku ta hoga na pos, ketu bai nos no a tende nada mas kiko ta bai hasi ku e asuntu di preis di kuminda. Aparentemente ta warda e krísis dal nos mata pa ora tin poko sobrebibiente e ora ei numa kore bai wak kiko ta bai hasi. Ta mesun kos a pasa ku e asuntu di preis di energia. Nos a warda, warda, supsidiá, warda i awor nos ta na kareda. Remarkabel ta ku e miembro sindikal di e komishon ta bisando direpente ku no a bisa ku por wanta preis. Di tur manera ta e impreshon ei sindikalismo a krea si ku su ultimatum!
****
Ban wak si e siman ku ta bin ta bai tin moveshon pa loke ta trata e nesesidat pa atendé e asuntu di oumentu di preis mas pronto posibel. Kere nos ku e ta un bòm bou di nos desaroyo. Lorito kier bisa bon kla ku nos no ta eksagerá aki nan pero nos sa mira kosnan hopi adelantá. Warda e Lorito aki pa futuro i lo mira ku nos tabatin rason. Tuma nota ku na Haiti ya kaba a kuminsá bringamentu pa kuminda i hasta tin hende a muri!
****
Tòg ta remarkabel e silensio di SEHOS relashoná ku e kaso ku a tuma lugá di un señora ku a pèrdè su bida den sirkunstansianan ku ta meresé un investigashon. Riba Internet ta tur kaminda e reakshon emoshonal (i komprendibel) di famianan ta sirkulando ku ta desprestigiá e instituto seriamente. E mensahe ta atvertí tur hende pa wak bon bon ora nan famia drenta ei den pa nada no pasa. E famia ta hopi heridá i mester tin komprenshon pa esei. Tin biaha den e tipo di sirkunstansianan palabranan duru sa kai! Un biaha mas nos ta komprondé!
****
Nos ta konviví ku e famia i den e kaso aki mas tantu ainda komo e mama a bai laga atras un beibi di apénas 11 luna. Nos ta kere ku mester bin un investigashon rápidamente i pa duna kuenta i rason ta kiko a pasa eksaktamente den e kaso aki, sea ku ta e trato no tabata bon òf ku e señora tabata víktima di diferente sirkunstansia.
****
Nèt e siman aki nos a papia ku un maestra di skol ku a kaba di duna lus na SEHOS ku a splika nos kon sublime e trato tabata na e instituto. El a bisa nos ku e mes, debí na tur publikashon, tabatin sierto miedu i preokupashon pero e trato ku el a haña tabata di klase apart. El a pidi nos pa hasta felisitá e sekshon aki pa e bon sistema i e kuido ku el a haña. Einan bo ta mira ku tin biaha tin persepshonnan kontrario di un instituto, loke ta hasi mas imperativo ainda pa e instituto duna kuenta i rason.
****
Nos ta bai keda te aki awe. Siman tabata pisá. Tin yen di sorpresa na kaminda pa otro siman. Nos lo informá bo na tempu. Pasa un dushi atardi i djadumingu i te djaluna awor ku Dios su poder!