ORANJESTAD / WILLEMSTAD – Aruba a lanta awe ku un di e krímennan mas kruel di su historia despues ku a resultá ku un hóben a mata su mama, tata i ruman. E kaso a kousa konsternashon riba e isla. E tata ta e konosido Juan Lampe ku ta traha na Banco di Caribe, miéntras ku e yu asesiná ta un lokutor na e konosido emisora di radio di Santa Cruz Top 95 FM. Segun e promé informashonnan, e hóben ku a mata su famia ta un drogadikto molestoso (chòler).
Outoridatnan tin e sospecho ku e asesinato a tuma lugá for di den oranan di mèrdia. Pero ta ayera nochi numa nan a bin tuma nota di e kaso na momentu ku huma a kuminsá sali for di e kas. P’esei den promé instansha tabatin e impreshon ku e hendenan a muri komo konsekuensia di e kandela pero esei no a resultá di ta e kaso. Un investigashon na e sitio a determiná ku e víktimanan a muri asesiná. A haña e víktimanan riba flur di e kambernan di e kas ku herida i slanan fuerte na kabes. Den e kas polis a haña tambe karbon pa hasi BBQ i tabata hole tambe e líkido ku ta usa pa sende BBQ. Esei, segun e investigadornan ta un indikashon, ku e sospechoso (nan) a trata di sende e víktimanan i e kas na kandela. Un di e kurpanan tabata duna indikashon di kemaduranan parsial.
Despues ku e notisia a plama ta masha hende a bai na e lugá kaminda e kaso a tuma lugá. Prinsipalmente e hechu ku tabata djabièrnè anochi a añadí na e kantidat di hende ku a aglomerá na e sitio.
E kaso a kuminsá lora na momentu ku un di e víktimanan ku ta traha na e emisora Top95 FM no a presentá na trabou. Despues ku a yam’é na diferente okashon i no a haña reakshon, a bai wak na su kas. Pero a konstatá ku e kas tabata kompletamente será. Sinembargo ora ku solo a baha, hendenan den e área a ripará ku tabatin huma ta sali for di e kas. Mesora a avisá Brandweer ku a bai wak na e sitio i a deskubrí un krímen horendo. Na momentu ku nan a yega e miembro di famia ku despues a resultá sospechoso di e krímen a kore sali indikando ku tin hende na kandela den e kas. Pero e kurpanan no a haña oportunidat pa kima i nan tabata den un plas di sanger. Loke a hasi e kaso mas makabre ainda ta ora a determiná ku a trata di kap e kurpanan na pida pida, aparentemente den un intento pa deshasí di nan den un kandela ku kombustibel pa sende BBQ. Na e sitio di e krímen outoridatnan a detené Eugene Lampe di 29 aña di edat, ku ta konosí pa polis i ta un drogadikto. El a atmití su partisipashon den e akto kruel aki. E no tabata duna ningun indikashon di remordimentu.
A identifiká un di e víktima komo Juan Lampe mihó konosí komo Colai òf Juancho, empleado di Banco di Baribe di 60 aña di edat. E otro víktimanan tabata su kasá sra. Aura Lampe-Geerman di 57 aña di edat i Edvard Lampe di 30 aña di edat. E famia tabata konosí komo un famia ehemplar i humilde loke a pone ku hopi hende a keda ku e pregunta awe: di kon?
Outoridatnan ta hasiendo un investigashon profundo den e kaso aki pa determiná kiko a pasa eksaktamente i tambe pa haña sa si por tabatin mas hende enbolbí den e kaso aki. Nos tin mas detaye i pòrtrèt di e kaso aki den nos edishon di Aruba di awe.