Desaroyonan na Ulanda un menasa pa Kòrsou

WILLEMSTAD – Partido MAN a atvertí e siman aki ku e kresementu di partidonan (ultra) derechista na Ulanda lo pone ku bida den reino lo no ta dòrná ku pas i amor. “Kòrsou mester ta prepará pa un periodo di opreshon i ofensa kontinuo”, asina e partido ta bisa relashoná ku e desaroyonan na Ulanda kaminda e partido nobo di Rita Verdonk “Trots op Nederland” a presentá e siman aki i tabatin palabranan krítiko den direkshon di Antia. Banda di esei tin e fenómeno Geert Wilders ku a ofendé musulmannan ku su pelíkula FITNA. Wilders, lider di e partido na kua Hero Brinkman tambe ta pertenesé, tambe ta hopi krítiko di e desaroyonan na Antia.
Enkuestanan na Ulanda ta indiká ku e partido nobo di Verdonk por konta ku por lo ménos 25 asiento si tabatin elekshon awe. Den algun sírkulo ta menshonando ku Verdonk lo por ta e próksimo promé minister di Ulanda. Por sierto e mes no ta rechasá e posibilidat. E próksimo elekshon general na Ulanda ta na 2010 pero semper ta keda e posibilidat di un krísis polítiko ku por antisipá elekshon.
Partido MAN ta bisa ku el a bini ta tumando nota di un intoleransia kresiente na Ulanda kontra stranheronan no Europeo. Bou di grupo ta kai tambe e mas di 100.000 antiano i yunan di Kòrsou na Ulanda ku segun un rapòrt di Union Europeo deliberadamente ta keda diskriminá na Ulanda den tur ámbito di bida, pa nan koló i desendensia no ulandes-europeo. E intoleransia aki ta ekspresá su mes den profilashon polítiko di forsanan derechista i konservador na Ulanda ku a lanta nan mes partido ku tendensianan fasista kamuflá ku a eksistí na Europa promé i durante di dos guera mundial. Ta trata aki di e partidonan P.V.V. di Geert Wilders i Hero Brinkman i Trots op Nederland di Rita Verdonk ku tin te hasta hopi chèns di forma parti di e siguiente Gobièrnu di Ulanda i ku esei di reino. “Mirando e hecho ku e profilamentu aki ta tuma lugá den partidonan di otro tendensianan tambe ta puru naividat di esnan ku ta kere i en partikular partido PAR, ku nos bida den reino lo ta dòrná ku pas i amor. Ta puru naividat di kere ku Ulanda lo brasa i stima nos. Mas real ta pa nos prepará pa un relashon entre e partnernan di Reino ku tin mes un karakterístika ku e manera ku ta trata Antianonan na Ulanda. Mas realístiko lo ta di prepará pa un relashon di opreshon i ofensa kontinuo. Mas realístiko lo ta pa prepará pa un periodo di lucha kontinuo ku Ulanda. E deklarashon final i e manera ku aktualmente Ulanda i no Kòrsou, ta yena e proseso di struktura estatal, ta forma un preludio pa loke nos por spera”, asina MAN ta bisa den su análisis.
MAN ta atvertí ku mas lihé formalisá loke Ulanda kier, lo no yuda nos ku nada, komo ku e historial di Ulanda ta konosí. “Ora ku nan haña ta bon nan ta kambia kos i no tin niun hende ku por bisa nan nada. Rita Verdonk ku te hasta ta menshoná komo e siguiente promé minister di Ulanda a mustra kaba den ki direkshon e kier bai. Ta un menasa serio pa komunidat, si no tuma e desaroyonan aki ku ta hinka Kòrsou den un situashon di supordinashon kolonial atrobe na serio. Pero nos por bòltu e menasa aki den un oportunidat. Kòrsou mester ta firme den loke e kier. Un Kòrsou Outónomo den Reino, kaminda ku Kòrsou ta haña tur derecho i debernan ku aktualmente Antia i Aruba tin. Den un siguiente fase di nos eksistensia, nos lo por bai fiha bista riba soberanía di nos pueblo”, asina MAN ta bisa.
Partido MAN ta bisa ku el a tuma nota di e pelíkula trahá pa e Ulandes Geert Wilders, lider di PVV. “Saliendo for di nos prinsipionan Partido MAN ta respetá profundamente ekspreshon liber di opinion. E pelíkula di Geert Wilders sin embargo ta traspasá fronteranan di loke por keda kalifiká komo étika di kombibensia humano falta di rèspèt i toleransia i a insultá un religion ku ta e di dos mas grandi di mundu ku 1.3 mil mion siguidó. E ta ofendé tambe e kantidat di musulman yu di Kòrsou o siudadanonan musulman di nos isla. Hustamente loke e pelíkula ta prediká ta rabia i odio entre gruponan religioso i ta un sosten na gruponan ekstremista ku ta hasi mal uso di religion pa práktikanan ekstremista i violensia kontra humanidat. Ku esaki e pelíkula ta pinta un kuadro di referensha robes di e miones di musulman rònt mundu i tambe na Kòrsou ku ta stimadó di pas”.
Partido MAN ta kondená e akto aki di Geert Wilders i den esaki ta solidarisá ku musulmannan riba nos isla i en partikular e miembronan di nos partido ku ta musulman, asina e partido ta bisa.