Maltrato di mucha; Nan por informá instanshanan konserní:

WILLEMSTAD – Un tayer ku tabatin resientemente a duna maestronan informashon ku dil ku e señalnan ku ta indiká ku a maltratá un mucha. E fenómeno ta kresiendo mas i mas pero te awor aki maestronan no por a hasi anda ku e informashon, hasta si haña sierto indikashonnan. For di aña pasa, e maestro tin outoridat pa informá e instanshanan konserní. P’esei a tene resientemente un tayer ku e tema “Dunami Amor i no kousami Doló” ku a atendé e fenómeno di Maltrato di Mucha. E tayer tabata ouspisiá pa Direktiva di Skolnan Katóliko.
Maltrato di mucha ta un problema serio den nos komunidat ku te rekerí nos atenshon. Na promé lugá pa e seriedat di e problema pa e mucha. Maltrato di mucha ta stroba un desaroyo salú i ta kondusí na daño permanente . Banda di esei, e fenómeno aki ta eksigí atenshon permanente.
Lamentablemente e mucha ta eksponé demasiado na maltrato i abuso. Na skolnan bo por detektá ku maltrato(òf e sospecho ku tin maltrato) di mucha ta tuma lugá. E maestro ta pasa hopi tempu ku e mucha, e ta krea un relashon di konfiansa i asina por señalá ku lo por tin maltrato di e mucha. Den práktika ta resultá ku pa bo dil ku e señalnan akí no t’asina fásil i ta kousa inseguridat. E trabou di skol pa ku maltrato di mucha ta pa señalá i informá instansianan konserní. Pa motibu di e inseguridat tokante maltrato di mucha esaki no ta sosodé manera mester ta, pero ta masha importante.
Pa e motibu aki, Direktiva di Skolnan Katóliko eksitosamente a organisá un kongreso. Durante e kongreso aki, a diskutí e tópiko maltrato di mucha i a duna maestronan informashon tokante señalnan di maltrato di mucha. Dunando informashon, Direktiva di Skolnan Katóliko ta spera ku e maestro por aktua di un manera mas profeshonal tantu preventivo komo kurativo den estrecho koperashon ku instansianan envolví. Instansianan ku a partisipá na e workshop aki ta: Skuchami (PSI), D.A.R.E., Fundashon Yamami, Sentro Guia Edukashonal, Ofisina pa Bienestar di Mucha, Departamentu Salu Hubenil, i Trahadónan Sosial di Direktiva di Skolnan Katóliko. Orador di órden na e konferensha aki tabata: Sr. Rodney Stewart, Sikólogo. Studiante Sennon Kastaneer a ehekutá e proyekto aki, na nòmber di Direktiva di Skolnan Katóliko.
E pòrtrètnan ta duna un bista di e tayer.