BOGOTA, Colombia, - Gobièrnu colombiano tin lokalisá n’e área selvátiko di Tomachipán, situá 70 kilometer sùitwèst di e kapital provinsial aki, e lugá kaminda “Fuerzas Armadas Revolucionarias de Colombia” (FARC) tin entre otro eks kandidata presidensial colombiano-franses Ingrid Betancourt i tres siudadano merikano retené, fuentenan militar i kampesinonan di e region a bisa El Nuevo Herald.
Segun e korant, Fiskalia di Colombia a kapturá Helver Uriel Rodríguez Cruz, dòkter di FARC, kende resientemente a atendé Betancourt, na un suburbio di sùit di Bogotá, i e ta’tin huntu kuné relato riba estado delikado di salú di Ingrid.
A informá ku Rodríguez, ta dòkter di frente di guera number un di FARC, komandá pa alias “Cesar”.
Fuentenan di Fiskalia General a sigurá ku fo’i masha tempu tin informashon di e dòkter ei, kende ta enkargá pa praktiká abortonan entre e damanan gueriero kendenan a resultá embarasá.
Dòkternan partikular konsultá pa diferente medio di komunikashon a bisa ku, di akuerdo ku e relato kapturá, Betancourt lo por ta sufri di problema ku kurason i nir, desareglonan den e sistema nervioso sentral i inkluso morto.
Ubikashon di Ingrid i e merikanonan n’e region di Tomachipán ta koinsidí ku informashonnan suministrá na periodistanan di parti di pastor katóliko Manuel Macera, kende tin 20 aña rekoriendo e region.
Tomachipán, situá kantu di riu Inírida, tin 300 habitante i ta pertenesé na munisipio di San José del Guaviare.
Por bai einan solamente ku avionetanan ku ta tarda 40 minüt pa yega i ta kontrolá pa Aeronáutika Civil i forsanan militar.
Dos kampesino rekomendá pa un fuente militar konsultá pa El Nuevo Herald a sigurá ku nan a mira guerieronan kargando un dama hopi flaku ku nan ta konsiderá ku ta Ingrid Betancourt.
Tambe nan a sigurá ku na febrüari último “pegá ku Tomachipán” nan a mira e tres merikanonan ku FARC tin den su poder ya for di seis aña.
Merka a ofresé 5 mion dollar pa informashon ku ta pèrmití reskate di e kontratistanan militar merikano Keith Stansell, Marc D. Gonsalves i Thomas R. Howes, sekuestrá pa FARC 13 di febrüari 2003.
Dia 20 di mart último, otro kampesinonan a bisa ku nan a mira ora e sekuestradónan tabata karga Betancourt banda di El Retorno (Guaviare).
Un di nan a deklará na periodistanan lokal ku el a mishi ku Ingrid su man pa anim’é.

Foto: Ingrid Betancourt 0704

Ingrid Betancourt na un lokalidat deskonosí riba pòtrèt emití pa Gobièrnu colombiano 30 di novèmber 2007.