MADRID – Fanátikonan no a skonde nan desepshon pa e manera ku e ekipo di Barcelona di e direktor tékniko ulandes Frank Rijkaard a bin ta funshoná últimamente. Na lugá di probechá e chènsnan, e fin di siman un biaha mas e ekipo mester a kontentá su mes ku un empatá kontra Getafe. Ku komo Real Madrid a empatá, esei tabata un bon chèns pa kòrta e diferensha den punto, pero Barcelona tambe e empatá.
Despues di e enkuentro na Nou Camp e ekipo a haña un konsierto di flùit i “boe” di parti di e fanátikonan. Diferente lensu di protesta a kai riba tereno na Nou Camp. Barcelona ku no por a konta ku su astronan Lionel Messi, Ronaldinho i Samuel Eto'o, no a logra kòrta e distansia riba e tabla di posishon despues di e derota di Villareal i empate di Real Madrid.
Den otro weganan di ayera Atlético de Madrid a sigurá e di kuater posishon ku un viktoria abrumador di 6-3 riba Almería E ekipo di Almería a duna bon bataya i a bin bèk na tres okashon, pero finalmente mester a sukumbí despues ku rèfri a saka dos di su hungadónan, un di pa un hugada brutu i e otro pa akumulashon di karchi hel.
Atlético a logra awor 53 punto, 3 mas ku su persiguidó mas serka Racing de Santander ku a kai 3-1 kontra Deportivo La Corunja. Real Madrid ku ta na promé lugá for di e promé fecha di e kampionato, tin 66 unidat despues di a empatá 1-1 ku Mallorca djasabra. Villarreal, ku a kai 2-0 kontra Sevilla i Barcelona ku a empatá 0-0 ku Getafe ta empatá ku 59 punto.
Na Italia, Inter a evitá ayera ku Roma ta aserk’é i a mantené kuater punto di distansia ganando Atalanta riba e di 32 fecha di Liga Italiano. Faltando 6 fecha pa final di e kampionato di Italia Inter a keda ku 72 punto i Roma ku 68 punto.
Na Inglatera, e brasileño Alfonso Alves a anotá dos gol pa Middlesbrough empatá 2020 ku Manchester United. E enkuentro a tuma lugá meimei di un sneu pisá den stadion Riverside.
Despues di e triunfo di 2-0 djasabra di Chelsea riba Manchester City, United mester a gana ayera. Na di 10 minüt Ronald Cristiano a mara e promé gol pa diabelnan kòrá (di su 37 gol di e temporada aki den tur kompetensia) pero Alves a bin bèk ku dos gol. Tabata Wayne Rooney ku na di 74 minüt di wega a empatá e partido. Awor aki Manchester tin un bentaha di 3 punto riba Chelsea i 3 riba e di tres lugá Arsenal ku a empatá djasabra ku Liverpool 1-1. Liverpool ta na di kuater. Manchester United lo topa Arsenal djadumingu awor.
Na Alemania Bayern Munchen a tuma un bentaha di 9 punto den Bundesliga despues di un triunfo na kas kontra VFL-Bochum. E wega a kaba 3-1. Ku e bentaha aki ta parse ku nada mas ta stroba Bayern pa bira kampion e aña aki. Den e partido di ayera e ulandes Mark van Bommel mester a bandoná e partido pa akumulashon di dos karchi hel.

Os:

Fanátikonan ta protestá ku lensu i flùit despues di e empate di nan ekipo Barcelona den Nou Camp. Barcelona a pèrdè oportunidat pa kòrta e distansia ku lider di e kampionato Real Madrid ku tambe a empatá.

Os:

E hungadó brasileño Alfonso Alves (Middlesbrough) a hinka dos gol kontra Manchester United. E kiper ulandes Erwin van der Sar no por a stroba e anotashon.