WILLEMSTAD - Si nos por a logra forma un gobièrnu i un parlamentu ku tabata mas tantu un refleho di un federashon di seis isla huntu, chèns ta grandi ku awe nos lo tabatin un Antia ku ta funshoná.
Esei ta konvikshon di William Marlin, miembro di parlamentu pa frakshon di National Alliance, partido polítiko di St. Maarten representá den Staten.
Djasabra último tabatin e selebrashon ofisial di 70 aña di eksistensha di Staten di Antia. Esaki a sosodé ku un reunion solèm di parlamentu den oranan di mainta.
Durante e reunion aki, por a skucha tantu ekspreshonnan di elogio komo tambe krítika fuerte riba funshonamentu di parlamentu durante e último 70 añanan.
Presidente di parlamentu Pedro Atacho, den su diskurso a bisa ku nos pais mester ta kontentu ku 70 aña di demokrasia parlamentario sin interupshon. Hopi pais na mundu, asina el a bisa, mester a hiba lucha fuerte, asta den sierto kasonan ku dramamentu di sanger pa nan a optené nan derechinan demokrátiko.
Den un reflekshon pa Radio Nederland Wereldomroep, William Marlin, representando National Alliance a bisa ku e ta weta bèk ku sintimentu miksto riba e periodo tras di lomba.
Nos no tabatin nunka un pais ku berdaderamente por a yama Antia.
E diferensha den representashon di e seis islanan tabata asina grandi, ku tardi òf tempran lo a surgi frikshon, segun Marlin.
El a duna un ehèmpel di esaki.
“Promé minister di Antia semper ta di Kòrsou, presidente di parlamentu mesun kos, Griffier semper ta sali di e isla mas grandi ku yama Kòrsou i asina tin vários otro funshon ku pa definishon Kòrsou mester a produsí. Esaki manera tur hende por komprondé, tardi òf tempran ta kondusí na frikshon.
Si tabatin un representashon mas balansá entre e seis islanan, kisas awe nos no ta papiando mes riba e nesesidat di kambio estatal. E Antia ku nos ta papiando di dje, lo a funshoná den práktika,” segun Marlin a trese dilanti.
Marlin a bisa ku St. Maarten lo por usa e modelo di Staten pa su mes, parlamentu unabes ku e isla haña e status di pais outónomo den Reino. Pero lo tin algun kambio fundamental, asina el a bisa mesora. Asina por ehèmpel St. Maarten lo ke un parlamentu mas independiente di gobièrnu, un parlamentu ku ta atendé su presupuesto e mes, un parlamentu ku e mes ta tuma su personal.
“St. Maarten,” asina el a agregá, “ke usa e fase ku e ta bai haña komo un pitstop pa independensia.”
Tur tempu, asina el a bisa, e islanan a sinti e arogansia i e dominashon di parti di e isla mas grandi, ku ta Kòrsou.
El a atmití, ku no por los esei for di tempu kolonial, kaminda Ulanda semper tabata dediká mas tantu tempu na Willemstad. Realidat ta, ku Kòrsou ta mas grandi ku e otro islanan, pero esei nunka tabatin mag di funshoná na desbentaha di e islanan mas chikitu, Marlin a duna di konosé.
“Un ehèmpel konkreto: Kòrsou tin sistema di riolering masha dékada kaba ta funshoná, pa kanalisá awa sushi. Tin isla ku no tin esei.
Na Saba un avion no por baha despues di 6’or, pasobra no tin iluminashon. Kòrsou konosé un aeropuerto internashonal pa hopi aña kaba. Kisas e tempu aya, esei tabata bon, pero un situashon ku atraves di añanan simplemente a bira inaseptabel,” di akuerdo ku e miembro di frakshon di National Alliance William Marlin.