WILLEMSTAD: - Aliansa Patriótiko, konsistiendo di partidonan di oposishon den Konseho Insular di Kòrsou ta keda dispuesto semper pa papia ku gobièrnu ulandes. Nos no tabata di akuerdo ku e forma ku kier a hasi esei djarason último, pero nos ta mantené kanalnan di komunikashon habri, asina bosero di Aliansa Patriótiko mr. Nelson Navarro, lider di Forsa Kòrsou a enfatisá.
Aliansa Patriótiko a tene un manifestashon siman pasá durante bishita di sekretario di Estado enkargá ku Relashon den Reino Ank Bijleveld.
E partidonan no tabata di akuerdo ku e tiki tempu ku nan a haña pa papia, ku tabata un ora i mei en total.
Kon por ta posibel diskutí struktura estatal, o sea futuro di Kòrsou, den apénas un ora i mei, siendo bo tin 21 miembro di Konseho Insular ku lo tin nan aporte pa duna? E kos aki ta algu apsurdo, asina Gregory Damoen, miembro di frakshon di Forsa Kòrsou den Konseho Insular a bisa na e okashon ei.
Segun Damoen, si analisá e tempu ku a pone disponibel, ta un kos ridíkulo. Si nos tuma un ora i mei, esei ta nifiká, ku pa kada miembro di Konseho Insular tin apénas algu mas ku 4 minüt.
“Si konsiderá ku probablemente Bijleveld mes lo ke bisa algu tambe komo introdukshon, anto e tempu ta bira ménos ainda. Ta di kiko nos ta papiando, di dos minüt pa kada miembro di Konseho Insular? E kos aki no por ta algu serio,” Damoen a bisa.
E manifestashon a bai den forma trankil. El a finalisá ku e partidonan entregando un karta di protesta na e representashon di Ulanda na Kòrsou.
Kisas por t’asina ku e manifestashon a krea e impreshon komo si fuera partidonan di oposishon a dal porta sera pa kombersashon. Nada ta ménos bèrdat, segun Nelson Navarro a trese dilanti.
El a mustra ku Aliansa Patriótiko niun ora so a bisa ni tampoko a duna e indikashon ku nan a sera tur kanal di komunikashon.
“Nos ta keda dispuesto pa papia, numa ku e kombersashon mester tin un base realístiko si. Nos ta konsiderá, ku ta importante pa sigui papia pa splika nos punto di bista. Nos ta keda dispuesto pa papia. Si Ank Bijleveld ta deseá esei, nos ta asta dispuesto pa bai Ulanda pa splika nos posishon,” di akuerdo ku e bosero di Aliansa Patriótiko Nelson Navarro.