WILLLEMSTAD - E kompania di konvoi di Kòrsou Autobusbedrijf Curacao, no t’ei na promé lugá pa hasi ganashi. Tarea di e kompania aki, meskos ku den mayoria parti di mundu ta pa sirbi komunidat, dunando un bon servisio.
Esei pa Wendell Meulen di e sindikato UGTK/CADMU mester ta punto di salida
Meulen a bisa esaki den kuadro di e negosiashonnan ku ta kanando pa yega na un kontrakt kolektivo nobo pa trahadónan di e kompania di konvoi.
E deliberashonnan no ta bayendo fásil. Ya tin algun tempu kaba ku partidonan ta sintando na mesa pero te ainda no tabatin masha progreso den e negosiashonnan.
Ta konosí di otro banda, ku e kompania ABC no ta pasando su mihó momentunan. Esei ta un dje faktornan pakiko te ku awor e empresa semi estatal no ta masha inkliná pa kumpli ku tur e deseonan dje sindikato. Ta un hecho ku e kompania di konvoi ta pasando momentunan difísil pa basta tempu kaba. Situashon finansiero no ta kos di gaba, miéntras ku estado físiko di e flota di vehíkulo di ABC dia pa dia ta birando mas grave.
Den pasado a yega di buska konvoi segunda mano for di diferente destinashon, di manera ku tin diferente marka di konvoi ta kore rònt na Kòrsou. Asta tabatin un aña ku a manda buska konvoi for di Brasil ku tabata ekipá ku èrko. Pero manera por a antisipá, e èrko a daña den un tempu relativamente kòrtiku.
E konvoinan simplemente no por a soportá e intensidat di trabou i ta mustrando kaba señal di deterioro.
Wendell Meulen a bisa ku e por tin komprenshon pa e situashon di e kompania, pero ku tin mas faktor ta hunga un rol.
“Pa kuminsá, nos komo sindikato no ta weta ki vishon gerensia tin pa futuro di e kompania. Mester determiná kon i na unda ta bai, pa asina bo por stipulá un maneho di mehorashon i kresementu. Nos no ta weta esei den niun sentido,” Meulen a bisa.
El a mustra ku e sindikato a basha hopi awa kaba den biña. Ta for di 2005 e kontrakt kolektivo a vense i a prolongá te ku bai ku un aña. Ta yega momentu ku mester sinta papia ku otro pa weta kon ta sigui. Asuntu di sigui prolongá, sin un perspektiva tampoko no ta un opshon, el a agregá.
Meulen a bisa finalmente, ku e ta spera ku partidonan lo haña otro na mesa. ABC no t’ei pa hasi ganashi. Nos ta kere, ku si e “break-even” lo ta bon, pero ABC mester realisá na promé lugá, ku e t’ei pa sirbi komunidat, di akuerdo ku Wendell Meulen di e sindikato UGTK/CADMU.