WILLEMSTAD – “Den e era nobo ku nos lo drenta, ku institushon di Pais Kòrsou, no tin lugá mas pa nombramentu polítiko manera el a bin ta tuma lugá den pasado. Esei mi por sigurá boso”, asina diputado Zita Jesus-Leito a deklará durante su presentashon den e seshonnan di informashon pa empleado públiko ku a tuma lugá siman pasá na International Trade Center.
Mester bisa, ku práktikamente tur empleado públiko a asistí na e enkuentronan aki, ku tabatin durashon di 2 ora kada unu, konsiderando ku ta na nan mes interes tambe.
Durante e diferente presentashonnan ku a tuma lugá, entre otro di sekretario di Estado enkargá ku Asuntunan Konstitushonal Hubert Martis, di hefe di Asuntu di Personal di gobièrnu di Kòrsou i di e kompania KPMG ku ta enkargá ku diseño di e aparato gubernamental nobo pa Pais Kòrsou, por a ripará klaramente sinembargo, ku ainda tin hopi pregunta sin kontesta.
Esaki a krea sierto inkietut entre e empleadonan, ku a manifestá ku e dia ta yegando, anto ainda no tin klaridat riba diferente kos importante.
Un nota interesante ku por menshoná aki ta e hecho, ku Hubert Martis, a bisa ku pa gobièrnu, no tin kambio den su planifikashon.
Nos ta mantené e fecha ku nos tur a palabrá, esta 15 di desèmber 2008, komo fecha riba kua e kambionan mester bira un hecho.
Ta den e lus ei mes, mester mira tambe e hecho ku durante e enkuentro, gobièrnu a anunsiá na tur empleado públiko ku pa mas tardá dia 1 di sèptèmber benidero, lo hasi kada ámtenar un oferta. Manera LA PRENSA a informá anteriormente, no por bisa ainda si tin hende di mas pa e aparato públiko nobo. Ku otro palabra, no por bisa pues si mester manda hende kas den forma obligatorio. Esei lo dependé di vários faktor, entre otro kuantu hende den forma boluntario lo bai, kuantu ta bai den forma natural, esta ku penshun i kuantu lo hasi uso (boluntario) di e areglo di VUT i Wachtgeld. E ámtenar tin un sierto periodo pa reakshoná riba e oferta aki. Kuantu tempu e lo haña, tampoko ta konosí ainda.
Partikularmente e forma ku ta bai usa pa nombra hende den e aparato nobo aki tabata motibu di sierto preokupashon serka e kuerpo di ámtenar. Pero, Zita Jesus- Leito a sigurá ku gobièrnu lo apliká métodonan basá riba ophetividat den e proseso di nombramentu aki.
Hecho ta, asina diputado Jesus-Leito a enfatisá, ku gobièrnu ke kuminsá e entidat nobo na un manera korekto. Nos no ke e situashon kaminda nombramentu ku no ta na su lugá, ku no ta hustifiká, ta tuma lugá.
“Mi mester atmití, ku tur partido polítiko a hasi nan mes kulpabel na esaki den pasado, sin eksepshon. Pero, esei no ta kita, ku nos ke kuminsá di nobo, anto manera mester ta. No tin lugá pa e tipo di nombramentunan aki mas,” e diputado a agregá.