WILLEMSTAD – E website liveincuracao.com no ta ofresé solamente un skat na informashon balioso i variá di nos isla loke ta interesante tantu pa esnan den eksterior komo esnan bibá aki mes. Awor ku a pone un webcam riba dak di Plaza Hotel den Punda, a bira posibel tambe pa durante 24 ora pa dia sigui tur moveshon den entrada di nos haf ku ta e ardu ekonómiko mayó. Un di e servisionan mas usá riba e website interaktivo aki ta un registro di kondolensia. A base di notisianan di morto por manda mensahe di kondolensia pa famia di e defuntunan.
Ya na e bolsa Living den WTC na ougùstùs 2006 e kompania Iseeyou a lansa e website aki. E tempu aya e tabatin un karakter mas komersial ainda. Mientrastantu a modifik’é algun bes i a agregá múltiple rúbrika informativo. E vershonnan mas resien ta muchu mas atraktivo i nan ta haña un bon akohida serka públiko. Sifranan a mustra ku ta habitantenan di Antia mes ta forma e grupo mas grandi di esnan ku ta bishitá e website aki; esnan na Ulanda ta na di dos lugá, siguí pa esnan na Merka i despues ta sigui hende for di tur parti di mundu. Na 2007 ya e website tabatin un total di mas ku 1 mion hit. Pa luna liveincuracao.com tin un promedio di sigur 100.000 hit. Ademas, na mart e aña aki so mas ku 5000 bishitante a konsultá e página di webcam, loke ta ilustrá ku su popularidat tambe ta kresiendo.
Ta trata di un website ku hopi faseta. Aparte ku e ta duna CAP su orario di yegada i salida di buelo na aeropuerto Hato, por haña tambe orario i tarifa di konvoi; dianan ku tin barku krusero den haf; dato di konsierto, bolsa, eksposishon i aktividatnan karitativo ku ta na kaminda, sin papia mes di e konekshon direkto pa e resúmen di aktividatnan di K-Pasa i Teatro Luna Blou; dato di kompanianan di utilidat manera Aqualectra, Selikor, UTS, ofisinanan di pòst, belasting i Curoil, pero tambe wardanan di polis pa por ta na sirbishi di hende ora mas mester di dje. Riba e website aki por haña tambe reportahe di pòtrèt ku nan ta remplasá ku sierto regularidat pa material fresku. Tambe nan ta duna algun informe di aktualidat, ounke esei no ta e ophetivo primario di Iseeyou.
Sektor komersial
E relashon ku sektor komersial a keda intakto. Empresa nobo ta haña e chèns pa profilá grátis pa korto tempu riba e website. Despues ta na nan pa disidí si nan ke pone un propaganda pa mas tantu tempu riba e website. E ta kontené tambe un bista amplio di un kantidat grandi di empresa den diferente sektor, manera turismo, servisio, etc. Komo sosten na e merkado laboral tin un sekshon yamá work & jobs kaminda ta ofresé puesto di trabou, pero kaminda esnan ku ta en buska di trabou tambe por pone nan datonan pa wak si tin algu ku ta interesante pa nan.
Den liña grandi e mesun kos ta konta pa e sekshon home & housing, kaminda tantu esnan ku tin algu pa ofresé, komo esnan ku ta buska propiedat pa bende riba merkado, por topa. Esnan ku despues ta buska un fèrfdó òf ku ke hasi algu na interior di nan kas òf ofisina, tambe por haña loke nan ta buska riba e website. Ademas e ta kontené dato di kontakto di apartamentu, hotèl i otro medionan di akomodashon.
Aktua di forma interaktivo
Nan tin mag tuma aviso di morto di e korant Extra. Ounke no a duna muchu publisidat n’e, ya hopi hende ta hasi uso di e posibilidat pa atraves di e registro di kondolensia riba e website ekspresá nan konvivensia ku famia. Spesialmente pa famia i konosínan den eksterior esaki ta un progreso grandi. E karakter interaktivo di e website ta enserá ku nan por kontestá preguntanan ku bishitantenan por tin. Esnan ku ta manehá e website ke purba formulá kontesta riba tur petishon pa informashon di un forma korekto i dentro di un tempu rasonabel.
Mas webcam
Pa basta tempu Iseeyou a eksperimentá ku un promé webcam fiho riba Penthouse di Plaza Hotel for di kua por sigui e moveshonnan riba brùg di ponton, den Fòrti, na Awasá i asta e tráfiko ku ta move riba brùg Reina Juliana. No pa esnan bibá aki mes so, pero di mes manera pa tur interesado rònt mundu, e website aki ta duna nan un bista 24 ora pa dia riba tur moveshon rondó di nos ardu ekonómiko mayó, ku ta Bahia Santa Ana.
Mientrastantu Iseeyou a tèst un di dos webcam i e ta den uso kaba. Esaki ta móbil i pues por kambia su posishon, entre otro kaminda tin evento grandi i spesial. Di e manera aki mes den e fin di siman binidero ta bai pon’é na supermerkado Albert Heijn na Zeelandia na okashon di aktividatnan den kuadro di AH su promé aniversario na Kòrsou. E idea di Iseeyou ta pa gradualmente pone mas webcam na Kòrsou.