WILLEMSTAD / DEN HAAG – Kambiamentu di zeta di outo no ta nesesario. E vehíkulo por keda kore pa semper ku e mesun zeta, basta pone zeta aserka ora tin mester. Esaki ta segun e èks direktor di Castrol, Henk de Groot.
De Groot a sali den publisidat ku e notisia akí basta aña pasá kaba. Na e okashon ei el a splika ku no tin sentido pa kambia e zeta di outo despues di 10 mil, 20 mil òf asta 30 mil kilometer. Tabatin hopi interes i e èks tòp di Castrol a demostrá ku vehíkulonan di klientenan, ku a kore 300 mil kilometer promé ku nan mester a kambia na zeta, ku kambiamentu di zeta ta estafa. Ku un ‘pènchi pa midi’ e outomobilistanan ku no tabata kambia nan zeta por a kontrolá e kalidat di e zeta. E vershon nobo di e ‘pènchi’ tin asta un chep ku ta alarmá ora e detektá algu robes ku e nivel di zür òf salu den e zeta.
Pero mannan largu di e industria di outo ta poderoso i e ‘lòbi di zeta’ ta un ‘worldplayer’, segun de Groot. “P’esei nan a sera mi boka, e interesnan ta muchu grandi. Asta laboratorionan ta bou di kòntròl di empresanan di zeta ku ta risibí pago i pues ta dominá. Akí ta trata di sentenar di mion di euro pa aña na desperdisio i un daño na medio ambiente ku no por interpretá den plaka. De Groot ta hiba un krusada kontra loke e ta yama e ‘mafia di kambiamentu di zeta’. Segun de Groot, ta fòrsa outomobilistanan, koredónan di motosaikel i trùk innesesariamente den gastu, pasó ku gran regularidat nan ta kambia nan zeta. Pasó ta esei garashinan i fabrikantenan ta preskribí. I ta ken ke kore e riesgo ku e garantia riba e vehíkulo ta kore peliger? “Mi outo a kore kaba 350 mil kilometer ku e mesun zeta di motor. Ku esaki mi ta spar mi pòtmòni i medio ambiente.”
De Groot a kompará e situashon di Ulanda i a konkluí, ku un kantidat di 6 mion vehíkulo ku ta kambia zeta 1 bia pa aña, bo ta papia di 600 mion euro i por lo ménos 30 mion liter di ‘supstansia pretu’ ku mester deshasí di dje. Mundialmente esaki ta vertiginoso: 200 miar euro na desperdishon. I no papia mes di e enorme plas di zeta shushi. “Pa e motibu akí tambe mi ta bati alarma”, de Groot a splika, “pa mi ñetunan. Mi ta mira regularmente kon hende dilanti di nan kas ta kambia zeta di nan outo antó bash’é den riol. Garashinan ta hib’é pa resiklá kaminda ta traha asfalt for di e zeta. Pero organisashonnan di medio ambiente ta mustra ku sobránan di e material tòg ta resultá den e awa supsuela. ”
Jules Maaten, Parlamentario di Oropa pa VVD, a yama e konklushonnan di de Groot riku na inisiativa. “Si de Groot tin rason, nos tin akí un chèns bunita pa un mundu mas limpi. Mi ta bai hasi Komishon Oropeo algun pregunta por eskrito tokante e siklo di kambiamentu di zeta di outo. Si nos posishoná nos mes dilanti e garoshi di industria i lòbi di zeta, mester tuma paso kontra nan. A tuma sufisiente medida kaba kontra e outomobilista i medio ambiente.”
Entretantu Henk de Groot tin 86 aña pero ketu bai skèrpi. Su susesor Richard un dia lo tuma e herensia di e ‘guru di zeta’, paso entregá no ta un opshon, ni pa tata ni pa yu. “Mi ta spera di por eksperensiá ku nos ta stòp ku e nònsèns akí”, Henk de Groot a bisa. “Sino mi yu tin ku sigui ku e lucha.”