O’STAD – Parlamento den un reunion di Dialuna mester a trata e asunto di reunión cu Sindicatonan den Accion. Esaki tabata un reunion cu e partido di oposición AVP a pidi. Sin embargo nan no a haya e partido MEP pa contribui pa Parlamento por tuma un posición y yega na un solucion mas rapido den e welga di empleadonan publico cu tin andando.
Lider di AVP Mike Eman a splica cu tin un carta fecha dia 25 di maart 2008, cu a drenta Parlamento, caminda e gremionan ta pidi atencion di Parlamento, pa cu e situación cu ta tumando lugar. Si t’asina cu ora tin negociacion entre Gobierno y un gremio, ta keda n’e dos partidonan ei pa yega na solucion, pero si no tin solucion, Parlamento mester por haci su trabou tambe.
E proposicion di AVP tabata, mirando cu den e negociacion, e situacion a tranca y mirando cu no tin un solucion na bista, AVP a pidi pa scucha cada fraccion den Parlamento, pa mira si Parlamento tin un rol pa hunga, sigur ora cu mira cu Parlamento mester controla trabou di Gobierno y den e caso aki no ta saliendo for di e situacion di crisis, cual tin implicacionnan nacional pa Aruba.
Pues ta trata di un situacion general di nos pais, y siendo un situacion di crisis, AVP ta kere cu Parlamento mester cai den e asunto aki y pa scucha e partidonan envolvi.
Mike Eman a splica den e conferencia di AVP cu nan kier a scucha e fraccionnan pa determina si nan ta mira cu cada fraccion ta kere cu n’e momento aki tin un responsabilidad pa busca un solucion di crisi. Den esaki tur fraccion di oposicion, MPA, RED, pero fraccion di MEP si no ta mira e momento aki pa Parlamento envolvi su mes den e crisis aki.
Aki por mira cu mayoria di MEP ta prefera pa laga e crisis aki sigui escala, mientras cu Parlamento por a bin cu liña di guia pa busca un solucion pa cu e perdida di poder di compra di e empleadonan publico, tabata palabranan di Mike Eman..
E ta bisa cu e actuación di lider di fraccion di MEP ta straño, pasobra siendo den pasado abogado di e clase trahador, awe a bira un marioneta anti-trahador. Pesei na opinion di mr. Mike Eman, mirando e situacion aki, fraccion di MEP no tin mayoria mas, manera nan ta kere y e cambio ta na caminda.