ORANJESTAD - Diahuebs ultimo, dia 3 di april 2008, alrededor di 5:35’or atardi tawata tin un interupcion den e suministro di electricidad pa e areanan di Sabana Liber y Alto Vista. Lineanan aereo di tension halto (12000 volt) ta suheto na diferente riesgo, por ehempel lamper (bliksem), pa cual motibo nos tin na diferente posicion «lightning arrester», como tambe « fuse » pa limita e riesgo di danjo, como tambe limita interupcion pa nos consumidornan. E motibo di e interupcion na e areanan ariba menciona tawata door di fuse bulá ariba dos poste di lus di tension halto (12000 volt), ocasiona door di un corto circuito ariba un « lightning arrester » ariba un poste di lus di tension halto banda di Sabana Liber 23 A. Na momento cu nos personal a detecta e origen di e interupcion, e « lightning arrester » a wordo desconecta y asina a restablece e suministro na e areanan afecta alrededor di 7:15’or diahuebs anochi.

Alrededor di 7:35’or anochi atrobe tawata tin un interupcion den e suministro di electricidad pa e area di Sabana Liber y Alto Vista, pero e biaha aki tambe pa un parti di Noord, Kudawecha, Seroe Janchi y Calabas. Un otro posibilidad (riesgo) pa lineanan aereo ta corto circuito ocasiona door di un obheto y/of animal, cu despues di a ocasiona e corto circuito no ta wordo encontra. Un parha por ehempel por ocasiona un corto circuito y nunca mas ta hanje. E manera di atende interupcion den lineanan aereo ta busca ariba full e lineanan e danjo cu e corto circuito por a ocasiona. Hopi biaha, manera tawata e caso ariba menciona, ta nos comsumidornan den e vecindario mes ta atende nos cu nan a mira un « flash » of a scucha algo ariba un poste. Den a caso aki, ariba diahuebs anochi, nos no a hanja ningun informacion y nos techniconan a core full e linea den tur e areanan ariba menciona. Esaki a tuma su tempo, y despues cu no a constata nada a tuma e desicion di pone e lineanan bek den servicio, cual a sosode alrededor di 10:45’or anochi. E motibo exacto a keda desconoci, pero e posibilidad cu tawata un obheto of animal ta muy probabel.

Tambe diahuebs ultimo, dia 3 di april 2008, alrededor di 4:45’or atardi tawata tin un interupcion den e suministro di electricidad pa un parti di e areanan di Hato, Bubali, Cunucu Abao, Pos Abao y Pitastraat. E motibo di e interupcion tawata door di un corto circuito ariba un poste di lus di tension halto (12000 volt), ocasiona door di un accidente na altura di Hato # 3, den cual e vehiculo a ranka e poste di luz por completo. Ariba e poste tawata tin banda di e lineanan di tension halto, cu no a sufri danjo, tambe lineanan di tension 127/220 volt, cu si a kibra. Cambiamento di un poste di luz, manera esun en cuestion ta un proceso cu ta rekeri bastante ora pa restaura e situacion. Nos techniconan a pone atencion na e lineanan di tension halto promer y alrededor di 8.20’or anochi e suministro pa tur area afecta, cu excepcion di e vecindario di Hato 3, a wordo restableci. Despues a continua cu e lineanan di 127/220 volt y alrededor di 10:30’or di diahuebs anochi e suministro pa e vecindario di Hato # 3 tambe a keda restableci.

Servicio na nos consumidornan ta di sumo importancia y un suministro sin interupcion ta esencial den e maneho diario di e empresa.
N.V. ELMAR ta pidi su disculpa na su consumidornan pa e inconvenencia cu e interupcion ariba menciona por a ocasiona.