ORANJESTAD- E sospechoso principal di e triple asesinato di famia Lampe diabierna ultimo, esta Eugene Lampe di 29 aña, a usa un biga 2x4 pa golpia su mama, tata y ruman te matanan.
Autopsia efectua ayera mainta a saca afor cu Eugene a bati su ruman homber Edvard cu e biga den su cabez varios bes, caminda inicialmente e victima lo a trata di wanta algun di e slanan aki cu su dos brazanan, pero e slanan fuerte a kibra e craneo di e ruman por completo, ocasionando su morto rapidamente.
Tur cos ta indica cu e tata, esta Juan Lampe, a wordo golpia ora cu el a regresa cas den oranan di mainta, un rato despues cu Eugene a caba di mata su ruman homber, y el a golpia e tata tambe sin misericordia, habriendo su cabez for di otro, matando e pober homber indefenso al inistante.
Ta ser pensa cu tur esaki a sosode den oranan di mainta, y e mama, esta señora Ina Lampe, a bai traha y no tabata na cas pero for di su trabou a drenta informe cu el a bai cas algo despues di 1’or di merdia, dunando indicacion cu e asesino Eugene, a sinta den e cas cu e otro dos victimanan morto, spera su mama yega cas.
Ora c u e señora a drenta tambe el a ataca e mama cu e biga aki, golpiando e señora asina fuerte den su cabez, cu el a ocasiona su morto tambe al instante. E fractura di e mama tabata menos serio cu e dos otronan pero si slanan mortal.
TRANKILIDAD
Fiscal mr Mos a mustra ayera cu pa banda di 2’or di merdia, tur tres persona ya a wordo asesina, confirmando asina cu e mama a ser mata asina cu el a drenta e cas ora cu el a regresa for di trabou.
Eugene a pasa oranan largo despues den e cas cu su famianan morto benta riba vloer, y no a reacciona y si e lo a bandona e cas bai laman un rato, den pick up di su tata, pa regresa y sigui cu e siguiente fase di su plan macabro.
Famia Lampe ta conoci den Santa Cruz di ta haci un di e mihor bbq-nan cu ta ser bendi riba diadomingo, y Eugene a pasa man pa saconan di carbon cu tabatin den e parti patras di e cas, y a basha esakinan riba curpa di e ruman y tata, y cu liquido a trata di pega e dos curpanan na candela.
Pues esaki a sosode caso cinco ora despues cu el a mata tur tres, y ta eynan a bin descubri e situacion macabro aki, ora cu bisiñanan a bai mira kico ta pasando, ora cu nan a sinti huma ta Sali for di e cas.
Ayera fiscal a confirma cu Eugene a bin admiti di a mata su famia, pero ainda e motibo di con el a comete e barbaridad aki no ta conoci.
Ayera tardi autoridadnan a entrega e curpanan bek na famianan, pa asina nan bai over na e actonan di entierro, den e drama familiar grandi aki, cu a causa un impacto formal riba henter comunidad.