PARIS – E vlam Olímpiko mester a wòrdu pagá na dos okashon ayera, pa motibu di protestanan fuerte kontra di China durante e relevo atraves di Paris.
Apesar di un gran presensia di kasi 3000 agente di seguridat, por lo ménos dos manifestante a logra aserká e vlam promé ku nan por a ser wantá.
Polis a tira vários manifestante abou i a arestá un di e aktivistanan ku a tira awa riba e antorcha, ounke ku e no por a paga esaki. Tambe polis mester a los gas lakrimógeno pa plama e manifestantenan ku a blòkiá e ruta.
E vlam mester a wòrdu transportá den un bus, pa por alehá for di e manifestantenan. Un atleta den ròlstul tabata transportá e antorcha, ora ku el a sali for di un tùnel, el a keda para pa manifestantenan ku tabata grita ‘Tibet, Tibet’. Tabata e di dos biaha den algun minüt ku polis a duna òrdu pa paga e vlam.
Den un otro insidente, un hòmber identifiká komo aktivista di Partido Bèrdè, mester a wòrdu wantá pa funshonarionan di seguridat ora ku el a trata na yega serka di Stephane Diaga, e eks kampion di 400 meter, ora ku el a kuminsá ku su relevo for di e promé piso di Eiffel Toren.
Djadumingu na London tambe e vlam Olímpiko a kousa basta káos den e suidat aki. Polis a keda konfrontá ku manifestantenan ku tabata protestá kontra di e abusu di derechonan humano na China i e resiente represhon na Tibet. Un manifestante a trata di kita e antorcha i otro a trata na paga esaki. A informá di por lo ménos 37 aresto.
E rekorido aki di e vlam Olímpiko ta esun di mas largu den historia. E ophetivo di China for di inisio tabata pa mustra mundu su poder ekonómiko i polítiko, pero aktivistanan a logra di probechá di e oportunidat aki pa kritiká e pais aki. E weganan Olímpiko ta tuma lugá na Beijing di 8 pa 24 di ougùstùs próksimo.
Ta spera mas protesta ora ku e vlam yega San Francisco, New Delhi i posiblemente otro lugánan durante di e rekorido di 21 parada den eis kontinente promé ku regresá China dia 4 di mei.
Polis na Fransia tabata na pia, den outo, bròmer i asta riba sgats pa vigilá esnan ku ta karga e antorcha.
E manifestantenan a subi riba Eiffel Toren i kologá bòrchi unda por a mira e renchinan Olímpiko komo bui.
Polis no por a duna un sifra eksakto di e kantidat di personanan ku a keda detené. Mireille Ferru, un dirigente di Partido Bèrdè a keda detené pa algun ora despues ku el a aserká Eiffel Toren ku un ko’i paga kandela. Durante henter e rekorido e manifestantenan tabata grita ‘e vlam di bèrgwensa.’




Arnaud Di Pasquale ta reakshoná despues ku outoridatnan a paga e vlam Olímpiko ku e tabata karga den kayanan di Paris ayera.