WILLEMSTAD – Federashon di Tènis di Antia Ulandes tin na su enkargo organisashon di e di seis Kopa Davis riba suela di Kòrsou.
Dianan 11, 12, i 13 di aprel próksimo lo tuma lugá riba kanchanan di SOV Asiento na Rust & Burgh, enkuentronan bálido pa Kopa Davis entre ekiponan di Antia i Bolivia.
E enkuentronan ta bálido pa e ronda di playoff di Kopa Davis Grupo-2 di Zona di Amérika.
Despues di a pèrdè den e promé buèlta di e fuerte ekipo di Ecuador den luna di febrüari último, awor e ekipo di Antia lo tin e fuerte kompromiso pa gana di Bolivia, pa asina mantené su mes den Grupo 2.
E pèrdèdó lo degradá pa Grupo 3 den 2009 i esei sigur lo no ta deseo di e ekipo di Antia.
E hungadónan den representashon di Antia Ulandes ta Alexander Blom, Nick van Rosberg, Romano Tatuhey kende últimamente a laga masha on impreshon atras ganando su kontrinkante di Ecuador i Martijn van Haasteren kende ta un ekselente hungadó den Double.
Kapitan di e ekipo pa e buèlta aki atrobe lo ta Kevin Jonckheer kende ta un èks hungadó di Kopa Davis di Antia.
E ekipo di Bolivia ta yega Kòrsou den e dianan aki i lo hospedá na hotel Holiday Beach.
Ámbos ekipo lo train durante di siman aki tantu mainta komo atardi riba e kanchanan di SOV Asiento.
E enkuentronan ta primintí di bira interesante, ya ku ámbos tim tin di bini fuerte pa asina keda den Grupo 2 di e Zona Amérika di Kopa Davis.
Tur hende ta kordialmente invitá pa asistí na tantu e sekshonnan di training komo na e weganan pa asina bin sostené e ekipo di Antia den Kopa Davis den e importante enkuentronan aki.
Entrada ta grátis i tur dia e weganan lo kuminsá pa 10’or di mainta.