PORT-AU-PRINCE, Haiti, - E represhon di manifestashonnan kontra pobresa i e kosto haltu di bida ayera a kousa un morto na siudat haitiano di Cayes, ku a pone ku kantidat di víktima morto a oumentá i bira sinku fo’i inisio di e protestanan 3 di aprel último.
Durante e protesta, gruponan di manifestante a alkansá sentro di kapital haitiano, Port-Au-Prince, pa ekspresá nan rechaso p’e deterioro di poder, un fenómeno ku ta gòlpia kapanan amplio di e poblashon fo’i kabamentu di 2007.
Na lokalidat di Cayes, situá 190 kilometer sùit di e kapital, míles di persona a sali riba kayanan pa protestá dilanti kas di un parlamentario.
Miéntras, na Port-Au-Prince, mas ku un sentenar di persona a reuní alrededor di Palasio Nashonal, sede di Presidensia di Haiti i dilanti Parlamento, pa protestá i eksigí pa baha preis di e alimentonan.
Despues di un deskanso durante fin di siman, e manifestantenan a bolbe subi kayanan di Cayes, e di tres siudat mas grandi di Haiti.
E marcha a kuminsá den e barionan mas pober di Cayes.
“Tur kos ta demasiado karu. Nos a subi kayanan pa pidi Gobièrnu pa kambia kondishonnan di bida di e hendenan. Esakinan no ta bon. Ta e bida karu, ta pone ku nos ta subi kayanan”, e militante sosial, Simeón Yves Marseilles, a ekspresá na TeleSUR.
Siman pasá, e manifestantenan a invadí base di e mishon di pas di Nashonnan Uní.
E bia aki, nan blanko tabata kas di senador di oposishon, Gabriel Fortune, kende a akusá e protestanan di ta impulsá pa narkotrafikantenan.
E manifestantenan a risibí tirunan di un frankotiradó, kende tabata posishoná riba dak di e kas.
E tirunan a kousa morto di un obrero, kende tabata den un Iglesia serkano, tambe a kousa kuater herido di bala.
E represhon no a detené e protesta ku de fakto a bira violento.
Miéntras tantu, e manifestantenan a primintí ku e siudat lo sigui paralisá te ora Gobièrnu kontestá nan demandanan.
Krísis alimentario mundial
Segun Programa Mundial di Alimentonan (PMA), organismo ku ta dependé di Nashonnan Uní (ONU), Haiti ta un di e tres paisnan di mundu ku mayó defisiensia di kaloria pa dia pa persona, mas o ménos 40 bou di 2.100 rekirí.
Dama direktor ehekutivo di PMA, Josette Sheeran, ayera a ripití na komunidat internashonal su petishon di yudansa urgente pa apoyá e operashonnan humanitario na Haiti.
“Loke nos a mira na Haiti ta loke nos ta mira na hopi di nos aktividatnan alrededor di mundu. Oumento di preis ta nifiká ménos kuminda i mas hamber!”, Sheeran a suprayá.
El a agregá ku un faseta nobo di hamber ta lantando, “tambe na e lugánan kaminda alimentonan ta disponibel. Kada bia tin mas i mas persona kendenan simplemente no por paga e alimentonan”.

Foto; Haiti protesta 0804

Habitantenan na Haiti ta protestá kontra oumento di kosto di bida.

Foto; Haiti protesta 1 0804

Hendenan ta kana pasa barikada na kandela na Port-Au-Prince, durante protesta kontra Gobièrnu pa preisnan haltu di alimentonan.