WILLEMSTAD – “A yega momentu pa hala un strepi bou di nombramentunan polítiko manera nos pais a bin ta konosé durante hopi tempu. E nombramentunan aki no ta kumbiní pais. E no ta kuadra tampoko ku prinsipionan di bon gobernashon”, asina diputado enkargá ku Asuntunan di Personal Zita Jesus-Leito a reakshoná riba e último desaroyonan rondó di nombramentu di e polítiko Gerrit Schotte na e servisio DROV.
Schotte ta kleim un puesto, hefe di e departamentu Facilitaire Zaken na DROV, indikando ku el a haña un nombramentu pa esei.
Un otro empleado públiko ku ta traha na DROV Sharine Zimmerman pa basta tempu kaba sinembargo a bisa, ku el a haña promesa ku e lo haña e funshon ei, ku ta nifiká un promoshon pa su persona.
Esei a trese sierto frikshon ku a pone ku e funshonario a entamá e kaso den korte ku mester bisa, ya kaba a bai diferente seshon.
Den un di e seshonnan aki a bin dilanti ku gobièrnu no a tuma un desishon ofisial riba nombramentu di Schotte na e puesto en kuestion, pero despues esaki a ser desmentí atrobe.
Gerrit Schotte aktualmente ta miembro di Konseho Insular pa frakshon di MAN. Komo tal, de fakto e no ta ehersiendo e trabou na e departamentu menshoná.
Korte, durante tratamentu di e kaso siman pasá a disidí ku gobièrnu di Kòrsou tin 3 siman di tempu pa tuma un desishon ku e ta nombra eks diputado i aktualmente miembro di Konseho Insular Gerrit Schotte na un otro puesto den e servisio DROV. Si gobièrnu no hasi esei, korte lo dikta sentensia.
Un elemento nobo si ku a subi mesa den e kaso siman pasá, tabata e hecho ku Gerrit Schotte, pa medio di su abogado a anunsiá ku e ta dispuesto pa konsiderá un otro puesto den e mesun servisio di gobièrnu.
Esei a parse di bira e posibel solushon pa e problema aki, pero sorprendentemente, diputado Jesus-Leito a bisa ku e abogado di gobièrnu no tabata outorisá pa bai di akuerdo ku e proposishon pa nombra Schotte den un otro funshon.
Jesus-Leito, a mustra ku e no por uni su mes ku e nombramentu di Schotte.
Nos gobièrnu, en todo kaso nos partido ta para pa nombramentunan hustifiká, kaminda e persona korekto ta haña e funshon ku ta habri. E prinsipio aki, di “the right person on the right place” ta un prinsipio ku semper nos a sostené. Anto ora nos papia di e persona korekto, nos ta papiando di e persona ku tin e kualifikashonnan nesesario, ku tin e konosementu i eksperensia rekerí pa e funshon,” diputado Jesus-Leito a indiká. Te na ora mes ku e tipo di nombramentunan aki a sosodé den pasado, a yega momentu awor pa hala un strepi, e mandatario a bisa.
Manera ta konosí, riba insistensia di Gobièrnu Sentral, gobièrnu di Kòrsou a instituí un komishon ku mester analisá nombramentu ku a tuma lugá den último tempu i ku tin e tinte di ta nombramentunan dudoso. E komishon aki mester a kaba su trabou basta dia kaba, pero te ainda esei no ta e kaso.
E mandatario a garantisá ku e komishon ta trahando diligentemente riba e nombramentunan aki, pa pronto duna gobièrnu e resultado.