WILLEMSTAD - For di 2003 e Bestuurscollege di e tempu ei a adoptá un maneho ku ta bisa, ku tur funshonario ku tabata kolaboradó di un mandatario, ta haña un funshon den gobièrnu. Esei ta algu lógiko tambe, sino di otro manera bo ta destruí karera di e persona ei, asina eks diputado i eks kolaboradó di diputado Charles Cooper Gerrit Schotte a reakshoná riba e konmoshon ku a surgi rondó di su nombramentu na servisio DROV.
Schotte ta tópiko di kombersashon último dianan, sigur despues di e último seshon den korte, kaminda Schotte a presentá un alternativa pa su nombramentu komo hefe di Facilitaire Zaken na DROV. Schotte a anunsiá, ku e ta dispuesto pa konsiderá un otro funshon, si e funshon ya menshoná ta formando asina tantu problema. Pa Schotte, di e forma aki el a krea un apertura pa e situashon di impase ku a surgi den e kaso aki.
Pero diputado Zita Jesus-Leito, kende a tuma nota di esaki, a bisa ku e no ta na fabor pa nombra Schotte mes den gobièrnu. P’esei mes e no por komprondé e defensa dje abogado di gobièrnu, ku reportadamente a bai di akuerdo ku e proposishon pa buska un trabou alternativo pa e polítiko di MAN.
Jesus-Leito ta kere, ku mester yega un fin na e tipo di nombramentunan aki ku tin un karakter, manera el a bisa, netamente polítiko.
Gerrit Schotte a rechasá e ponensia aki.
“Ta bon pa rekòrdá, ku nos ta papiando aki di un diputado ku den pasado resien a firma un dokumento, bou di e pretenshon ku e tin outorisashon di gezaghèber a hasi esaki, siendo despues a resultá ku niun ora so esei no tabata e kaso.
Ki nos ta haña? E mesun diputado aki awor ta bin bisa ku e abogado di gobièrnu no tabata outorisá pa bai di akuerdo ku e alternativa pa nombra Schotte den un otro funshon den gobièrnu. Ta komo si fuera e diputado aki no ta lesa su dokumentonan, ta kore firma pa loko anto despues ta bin argumentá ku e no tabata na altura. Ta unda a sali awor ku señora diputado ta bin kuestioná mi persona?” Gerrit Schotte a puntra.
El a bisa ku si tin un hende ku mester kuestioná, anto ta diputado Jesus-Leito mes. Schotte a insistí ku e tin derechi riba un trabou manera esei a bin ta tuma lugá último añanan ku tur eks kolaboradó di diputado. Ta konosí ku unabes un persona fungi komo kolaboradó di un mandatario, e ta haña e stèmpel mesora di ta pertenesé na partido di e mandatario en kuestion. Anto esaki mayoria biaha tin konsekuensha pa restu di e karera di persona, segun Schotte a afirmá.