WILLEMSTAD - Miembro di frakshon di Partij voor de Arbeid den parlamentu ulandes John Leerdam ta preokupá pa e informe ku Kòrsou no tin plaka pa kumpli ku beka na studiantenan ku ta studiando na Ulanda. Keda sin kumpli ku e studiantenan aki por tin konsekuensia serio pa nan futuro estudio, asina Leerdam a bisa den un reakshon riba e último desaroyonan.
Siman pasá – manera LA PRENSA a informá ampliamente kaba – a bira konosí ku no tin sèn pa paga beka na e studiantenan. Fundashon Finansiamentu di Estudio (SSC) ta pasando na e momentu aki den un proseso di reorganisashon. Algun tempu pasá a instituí un komishon ku mester a studia e situashon i bin ku rekomendashon pa fin di mart ku a pasa, pero e komishon no a keda kla i a pidi dos siman mas di tempu.
Pa SSC esaki ta ferfelu pasobra antisipando riba e informe di e komishon di eksperto aki, a kuminsá kaba na kòrta den presupuesto di e instituto.
Esei a kondusí un situashon kritiko ku pa fin di aprel awor, lo no tin e fondonan nesesario pa kumpli ku e studiantenan. Diputado Marilyn Alcalá- Wallé enkargá ku Enseñansa tin un biahe planiá pa Ulanda próksimamente pa diskutí ku su kolega ulandes riba e problemátika aki.
John Leerdam a ekspresá su preokupashon pa e desaroyo aki.
“Kisas mundu polítiko ulandes no ta realisá esei, pero e asuntu di beka aki ta di vital importansia pa e islanan. Nos konosé e realidat, ku si e studiantenan aki no sigui haña e plaka nan kontinuá ku nan estudio, e chèns t’ei ku nan ta stòp. Ku tur konsekuensia ku esei por tin, Leerdam a atvertí.
“Si nos ta papia konstantemente di hóbennan antiano problemátiko na Ulanda, nos mester realisá ku ora nos haña hóbennan ku ta dispuesto pa studia, nos mester sostené nan,” e parlamentario a agregá.
John Leerdam a ekspresá e speransa ku ora diputado Alcalá-Wallé ta na Ulanda, por yega na un solushon ku ta kumbiní tur hende i ku ta evitá ku hóbennan ta bira víktima.
John Leerdam no ta kompartí e pensamentu ku e asuntu aki ta solamente responsabilidat di gobièrnu di Kòrsou.
“E ta responsabilidat di nos tur den Reino. Si nos hóbennan ta enfrentá problema riba e tereno aki, e ta afektá nos tur,” el a bisa.
Diaweps awor tin un konsulta general den Tweede Kamer – e asina yamá Algemeen Overleg – i Leerdam a anunsiá ku e lo hasi pregunta na sekretario di Estado pa Relashon den Reino Ank Bijleveld riba e materia aki.
Leerdam finalmente a bisa, ku e ta kere ku un dje problemanan ku nos ta konfrontá den Reino riba hopi tereno ta e hecho ku mandatarionan den mayoria kaso no konosé e islanan di Antia. Ta importante pa mandatarionan ulandes tin mas konosementu, pasobra den e kaso spesífiko aki por ehèmpel, nan lo ripará ki efekto un kos asin’aki tin pa e islanan. Lo no ta un mal idea, asina el a agregá, si minister di Enseñansa Ronald Plasterk bishita e islanan di Antia pa e haña un mihó impreshon di e situashon.