WILLEMSTAD - Kiko ta pasando atrobe ku e kòntròl 100 porshentu na Schiphol. Di kon e reklamonan ta sigui drenta ku asina tantu insistensha?
Preguntanan ku e miembro di Socialistische Partij Harry van Bommel den Tweede Kamer a hasi na gobièrnu algun dia pasá.
Harry van Bommel a basa su karta riba un karta di protesta ku presidente di Sürnam Ronald Venetiaan a skibi promé minister di Ulanda Peter Jan Balkenende al respekto.
Venetiaan tabata hopi rabiá ku ainda tin siudadanonan di su pais ku ta pasando den momentunan di humiashon ora nan yega Schiphol, pasobra funshonarionan di siguridat ta ehersé un kòntròl sin presedente riba nan.
Esaki, no opstante ku un grupo di Sürnam a gana un kaso den korte i kaminda gobièrnu ulandes a anunsiá ku nan lo pone un fin na e tipo di práktika aki.
E kòntròl 100 porshentu ta enserá ku ta listra e avion, ta listra maleta di e pasahero, su ekipahe di man i ta listra e pasahero mes tambe. Hustamente esaki tabata motibu di hopi indignashon, partikularmente pa e forma ku outoridatnan tabata hasi esaki den pasado. A presentá algun aña pasá un bòdiskèn, pero e práktika di listramentu na kurpa di hende aparentemente ta kontinuando tòg.
“Nos a kere tur tempu ku kos ta bayendo bon. No muchu tempu pasá minister Maxime Verhagen a anunsiá ku kehonan a baha, pero tambe ku e kantidat di bolitero ku ta transportá bolita pa Ulanda tambe a bira konsiderablemente ménos.
Nos a kere ku kos ta bayendo bon, pero nos ta hañando otro sonido. E kos ta parse tòg serio,” asina Van Bommel a bisa.
Harry van Bommel a bisa ku e ta pidi minister presidènt di Ulanda si e ke divulgá e karta di presidente Venetiaan i kiko ta reakshon di Ulanda riba esaki.
E parlamentario di SP a bisa ku e ta haña ku mester tuma un desishon definitivo den e kaso aki i no por tene hende na liña. Van Bommel por sierto a lamentá ku Tweede Kamer, na su konsepto ta neglishando e asuntu aki.
“Si bo skucha keho di muhénan na estado, asuntu di kibramentu di paña na kurpa di pasahero, ta kos tristu, intolerabel i inaseptabel den nos sosiedat di awendia,” e parlamentario a bisa. El a remarká mas aleu ku outoridatnan ta papia un kos, pero den práktika ta hasi otro.
Harry van Bommel a bisa, ku pronto e mes lo biaha pa Sürnam, kaminda e lo papia ku partidonan polítiko, lo trata di papia tambe ku presidente Venetiaan. E kos aki lo ta haltu riba mi agènda, asina Harry van Bommel a sigurá finalmente.