ORANJESTAD- Durante ultimo siman di Maart a tuma luga na Maracaibo e di 4to Encuentro de Coro “Un Canto En Pascua” organiza pa e Grupo Coral Venezziola di Maracaibo.
Un di participantenan cu a haci e evento un éxito rotundo ta Sra. Mayra Kock-Garrido, e conocido musico cubano/arubano cu tin 12 aña como docente na Instituto Superior de Arte na Cuba y 10 aña dirigiendo e coro “Ars Nova”.
Na Januari e Grupo Coral Venezziola a haci un presentacion na Cas di Cultura cu a wordo ricibi cu hopi entusiasmo. Na e ocasión ey nan a sera conoci cu Mayra Kock-Garrido cu ta dirigi e coro Ars Nova di Aruba. Nan a keda hopi impresiona cu e profesionalismo di Sra. Kock y su conocemento di pedagogia musical y no a tarda mucho cu nan a invit’e pa comparti su conocemento y experiencia den teoria y practico di organización di direccion coral como parti di programa di “Un Canto en Pascua”.
Esaki tabata nifica un gran reto pa Mayra ya cu e tempo tabata cortico pa prepara mas di 10 obra polifonico di e gran maestronan di Renacimiento (siglo XVI).
A participa un total di 11 grupo coral di Maracaibo: Ayaxi Coro de Cámara, Ensemble Vocal Contraluz, Grupo Vocal Ensemble Uno, Coral Filarmónica de Maracaibo, Coral Antiphona, Cuarteto Domini, Schola Gregoriana Gaudete, Ensemble de Música Sacra de la Unica, Voces Blancas Urbe, Octavia Cantorum y e organizadornan Grupo Coral Venezziola.
Según e organizadornan tabata dos dia intensivo, yena cu muziek y compañerismo. Dirigentenan di coro di varios estado di Venezuela a participa. Tabatin representante di Lara, Bolivar, Caracas, Miranda, Aragua, Cojedes y Distrito Capital.
Mayra su preocupacion no tabata necesario. Su actuacion como conductor di e tayer a wordo aplaudi pa tur cu a asisti . Durante e tayer el a yuda desaroya e topiconan asocia cu technica y hermentnan multidisiplinario di polifonia cu ta wordo aplica pa e director di coro. Otro topico cu a wordo trata ta estudio di voz humano, e lenguahe y e diferente metodologianan vocal necesario pa e cantantenan y esnan cu di un of forma ta asocia cu dirigimento di coro.
E directornan di Venezziola a declara cu nan agradecimento na Mayra y su pedagogia hamas lo stop y nan ta spera cu pronto nan lo tin Mayra na nan pais atrobe.
Mirem de Ondiz, un participante di Venezziola mes a comenta: “Un docente excelente! E sa di loke e ta papia y e sa di splica y transmiti su conocementonan cu generosidad, disciplina y amor. Danki na tur cu a contribui pa haci soño bira realidad. Prof. Henry Quintero di Caracas a skirbi cu e distancia y cansancio no tabata suficiente den su caso pa kita su deseonan pa yega Maracaibo, pasobra su expectativa pa e tayer tabata asina grandi. “Di mi curason mi ta felicita Grupo Venezziola cu a organisa e tayer. Mi ta bay bek Caracas cu un conocemento grandi, imparti pa un maestra asina exelente..”