Reconocimento pa Arubianonan na Venezuela

ORANJESTAD- Aruba tin suerte tambe cu Aruba a establece bon relacion cu Venezuela, especialmente cu Maracaibo, riba nivel musical cu ta resultando den desaroyo di nos futuro musiconan y hopi intercambio di artista.
Mayra Kock-Garrido a dicta tayer coral na Maracaibo y na su regreso na Aruba, el a mustra impresiona bisando:
“Tabata un siman intenso, di concertnan y di trabou, un experiencia bunita cu tabata mas cu satisfaccion y exito profesional. Pami, tabata ademas un gran demostracion di calor humano; m’a sintimi util y completo compartiendo mi conocementonan y hopi emociona recibiendo tanto demostracion di gratitud di asina tanto hende di talento”.
E organisadornan ta considera cu e programa tabata un exito y nan compromete nan mes di haci e encuentro na nivel nacional otro aña.
COOPERACION
Aki na Aruba nos tin suerte di tin hendenan di talento manera Mayra. Nos tin suerte tambe cu Aruba a establece bon relacion cu Venezuela, especialmente cu Maracaibo, riba nivel musical cu ta resultando den desaroyo di nos futuro musiconan y hopi intercambio di artista.
Tempo cu Simon Gollo y Ibrahim Abreo a duna un concierto (gratuitamente!) pa yuda Aruba Scholarship Foundation recauda fondo na 2006, nan a dicta diferente tayer na casi cuarenta hoben musico Arubiano. A base di nan recomendacion nos hoben violinista Omar Kock a asisti na diferente ocasion lesnan di violin na Maracaibo como invitado (y huesped na cas) di Gollo.
Di e tempo ey tin cooperacion hopi sera entre Armand Simon (otro talento di Aruba!) cu ta organisa e Festival di Piano aki na Aruba y Simon Gollo cu ta organisado di e Festival Musical Nuevo Mundo (FMNA) na Maracaibo. Aña pasa diferente musico di Venezuela a tuma parti den e festival di Armand, y e aña aki Armand lo acompaña e gran flautista Nicaulis Alliey den un concierto di FMNA na Maracaibo. Esaki lo ta un “repeat performance” ya cu nan a toca hunto den Access Gallery aña pasa.
Na Januari nos por a goza di e Grupo Coral Venezziola cu a canta ( tambe gratuitamente) den un presentacion auspicia pa Circulo Pro Arte. E concierto aki a resulta den e invitacion na Mayra dicta e tayer na Maracaibo.
Mi ta spera cu pueblo, comercio y gobierno di Aruba tuma nota di tur e actividadnan aki cu ta di hopi beneficio pa desaroyo di nos ambiente cultural y lo apoya e organisadonan cu nan presencia ora di concierto y cu donacion ora ta necesario.