ORANJESTAD - Bosonan ta corda ainda cu e celebracion di e aña di Hubileo di Diocesis di Willemstad a cuminsa riba fiesta di Cristo Rey, 25 di November 2007?. Tabatin presente un gran cantidad di hende cu a asisti na e celebracion aki riba Plaza Betico Croes, y nos a haña e oportunidad pa manifesta un bes mas nos fe como cristian y nos a uni den oracion.
P’esei awor nos ta bai celebra e Hubileo di Oro di e fundacion di nos Diocesis, cual lo wordo inicia na Curacao dia 28 di april, y despues lo celebra esaki riba cada isla un dia stipula pa cada isla di Antias, Boneiru, San Martin, San Eustacio, Saba, y Aruba, ‘seis isla uni den Cristo.’
Aruba lo celebra e fundacion di nos Diocesis riba diadomingo 4 di mei y lo tuma luga atrobe riba Plaza Betico Croes pa 6’or y mei di atardi durante un Celebracion Eucaristico presidi pa Monseigneur Luis Antonio Secco y co-celebra pa tur Pastor di Aruba. Por fabor tuma bon nota cu lo no tin celebracion Eucaristico riba e dia aki na ningun Parokia atardi.
Pa un compilacion chikito di e fundacion di nos Diocesis nos por referi na e edicion 111 di E Noticia na maart 2008. Den e edicion aki por encontra con e cincuenta aña tabata y a pasa.
Wel laga nos tur bini hunto riba 4 di mei pa gradici Dios pa tur loke nos a ricibi durante e cincuenta aña, “Como catolico, nos tin motibo grandi pa gradici, pa a ricibi un herencia di Fe, Speransa y Amor, pasa pa nos door di nos mayornan, nos sacerdotenan nos religiosonan, nos scolnan, nos gruponan religioso” esaki segun Obispo Luis Antonio Secco den Piskado di luna di januari 2008.
Rumannan, ta keda cordialmente invita pa bini hunto anto como ruman den Cristo pa pidi’E yudansa pa nos por sigui nabega den e boto di Fe y Speransa ariba e olanan den lama di nos bida. Pero nos mester pensa cu e boto tin un bela di Speransa y nos mester sigi confia cu nos tin Cristo y nos Mama Maria pa guia nos si acaso nos topa mal tempo na caminda.