ORANJESTAD- Un delegacion di Hulanda, consistiendo di miembronan di e Directie Cultureel Erfgoed di Ministerie Onderwijs, Cultuur en Wetenschap, a haci un bishita di trabou na Aruba den cuadro di trabounan di restauracion di monumento. Den e edificio monumental recien restaura door di e fondo di monumento Aruba, unda Ministerio di Labor, Cultura y Deporte ta ubica na Wilhelminastraat 6, e bishitantenan a haya un oportunidad di mira pa nan mes con edificionan monumental ta ser restaura na Aruba, te cu nan ta ser poni den servicio di forma optimal como oficina.
Tabata sra. Doreen van Elst, afdelingshoofd, sr. Jan de Jong, projectleider modernisering monumentenzorg y sr. Jan van de Voorde, hoofd sector regioservice, acompaña pa sr. Maarten van Rossum, di VNO Aruba kende a topa cu srs. Ralph Croes, presidente, Ramsay Acosta, secretario, Byron Boekhoudt, tesorero y Renato Petrochi, administrado di despacho di Stiching Monumentenfonds Aruba. Durante un interacambio ameno a dialoga riba e posibilidadnan pa traha mas di estrecho cu madre patria y haci uso di fondonan manera restauratiefonds di Hulanda.
Monumentenfonds Aruba, ta un organisacion hoben cu dies aña di existencia, durante cual periodo a financia restauracion di varios edificio monumental, mantencion y administracion di monumento. Entre e monumentonan por menciona, Stadhuis y Censo, Ministerio di Cultura, Huisje Wild, Museo di Placa. Mientras tin planes pa mas restauracion e fondonan ta keda limita.
Monumentenfonds su fuentenan di entrada ta principalmente subsidio di gobierno di Aruba como tambe huur di edificionan restaura y benta di e calender di monumento. Ademas di algun donacion di sector priva pa produccion di e calendar, e contribucion di sector priva den restauracion y mantencion di monumento, ta minimal te na e momento aki.
Directiva di Stichting Monumentenfonds a keda sumamente satisfecho cu e compromiso recien expresa di Gobierno Hulandes, reservando fondonan pa restauracion di monumento na Aruba. Directiva di Monumentenfonds a expresa nan boluntad di asumi un responsabilidad den e proceso pa facilita mas fondo pa restauracion di monumento di Aruba.