WILLEMSTAD - Un komienso di temporada di Biyar espektakular Federashon di Biyar Kòrsou tabatin. Un total di 56 biyardista a partisipá den e promé evento ku tabata e no. 1 di Tour Bola 8.
FeBiKo ta sumamente orguyoso di e adelanto ku a keda demostrá durante di e torneo i mester ser masha sinsero ku no por papia di sorpresa i o suerte.
E nivel di wega a subi.
Vários enkuentro ku a tuma lugá den e promé buèltanan hala atenshon i naturalmente e derotanan di e faboritonan.
Grandinan ku a kai ku a demostrá ku no por sigui papia sigur den Bola 8 ku tin diferensha di nivel entre biyardistanan.
Ata algun di e viktoria i derotanan ku a hala atenshon: Joshua Harkelijn ta gana Rafael Flores 6 pa 5, William Ochoa ta gana e no. 1 hubenil Anthony Wever 6 - 4, Joaquin Virginie ta manda e tòp, number unu di tur tempu, Johnny Hellmund buèlta di pèrdèdó ku un viktoria di 6 pa 3. Bryan Landskind ta gana Raymond Magdalena 6 - 2. Badi Nahzat ta kue un viktoria importante riba e aktual kampion antiano di Bola 9, Michael Arvelo , ku skor di 6 pa 3.
Riba e último dia a konosé algun kara nobo den e último 8 hungadónan i esaki ta e satisfakshon di un direktiva ku ta traha duru pa hisa e nivel di e deporte.
Biyardistanan ku sigur a sobresalí tabata Evandro Hooi ku a finalisá na puesto 7. Juan van Doorn ku a keda na puesto 5 i Badi Nahzat ku a logra su mihó posishon te ku awor na puesto 3.
E veterano Raymond Magdalena kual su wega faborito ta Bola 8 despues di e derota na man di Landskind ta hasi un kòmbèk i demostrá ku mester tene kuenta kuné semper den e disiplina aki.
Raymond Magdalena ta gana 5 wega tras di otro pa hib’é final, ganando di Fauzy Halabi 5 - 4, Michael Arvelo 5 - 4, Jeffrey Nieuwenhuyzen 5 - 1,Bryan Landskind 6 - 5 i Badi Nahzat 7 - 5.
David Prins a yega final invikto i tabata sinta warda un Raymond Magdalena ku a pasa den kandela p’e yega final.
Un final di kita sombré, bon wega di ámbos banda, tur dos hungadó a bataya fuerte pa e título.
Ku e partido empatá na 6, Raymond Magdalena ta gana dos tras di otro i titulá kampion di e promé Tour Bola 8 ku skor final 8 pa 6.
Felisitashon na su persona di parti di FeBiKo i tambe un danki na Vernon Clarke ku a dirigí e evento ku a kana super bon.
E próksimo aktividatnan ta e promé di Tour Bola 9, dianan 24 pa 27 di aprel i e siguiente wikènt e promé di Tour di Straight Pool (14.1 kontinuo) dianan 2, 3 i 4 di mei.