WILLEMSTAD - Por lo pronto e kampaña grandi di konsientisashon ku Asosashon di Tráfiko Sigur Kòrsou, ASTK, tabatin planeá pa e aña aki, ta wantá. E kompanianan ku Asosashon di Tráfiko Sigur Kòrsou, ASTK, a aserká pa un kontribushon finansiero, di manera ku por ehekutá e proyekto aki, no a duna sufisiente respòns.
ASTK a anunsiá algun tempu pasá ku e ta sinti e nesesidat pa bin ku un kampaña pa konsientisá henter pueblo di Kòrsou. Sinembargo e organisashon ku ta boga pa seguridat den tráfiko, no ta deseá mas pa hiba un kampaña kòrtiku di algun dia òf un siman. ‘Nos ke un kampaña struktural ku ta dura sigur kuater luna’. Asina e presidente di ASTK, Rignald Christina a splika i tambe el a splika ku un kampaña dje intensidat aki i bon strukturá ta kostoso. “Esei ta un kapital ku nos sigur no tin”, señor Christina a remarká. E presidente di ASTK, a splika ku e organisashon a aserká vários instansia ku e petishon ku e petishon pa nan duna un kontribushon pa sera e presupuesto pa realisá e proyekto informativo. Pero e intentonan aki no a duna resultado positivo, segun Christina, pasobra lástimamente e kompanianan no a mustra interes.
‘Nos no a alkansá e montante ku nos a pensa di por spera pa realisá e proyekto’. Christina: “Ta p’esei pueblo por ripará ku e kampaña di konsientisashon ku nos ta pendiente pa bin kuné ta wantá”. E intenshon di ASTK, ta keda sinembargo pa riba un dia realisá e proyekto aki, pasobra e asosashon ta keda buska e manera pa haña finansiamentu pa e proyekto. ‘E plan no a muri, pero ta un realidat ku e ta dependé di donashon di instansianan partikular’.
DESEPSHON
Riba e pregunta si ASTK, ta desepshoná pa e falta di interes di parti di sektor privá, Christina a splika ku ASTK a konstatá ku último tempu donashonnan ta laga di deseá. E organisashon ta konsiente ku tin mas instansia ku ta solisitá yudansa, loke ASTK, tin komprenshon pe. Pero ta keda un hecho, segun señor Christina, ku siguridat den tráfiko tambe ta un asuntu hopi importante, ASTK tabatin e spera ku e por a haña e donashon nesesario pa hiba e kampaña. ‘No opstante ku nos ta un tiki desepshoná, nos lo no demotivá i nos lo sigui eksplorá e posibilidatnan pa haña fondo”, Christina a enfatisá.