PORT-AU-PRINCE, Haiti, - Situashon ta sigui tenso na Haiti awe, despues di sinku dia di protesta pa motibu di kosto haltu di alimentonan i akshonnan represivo desplegá kontra movementu sosial.
Miéntras tantu miembronan di Mishon di Nashonnan Uní pa Stabilisashon di Haiti ta kustodiá sede presidensial.
Ayera, mas ku shen manifestante a trata ataká Palasio presidensial na Port-Au-Prince, kapital di Haiti.
“Nos tin hamber!”, e multitut tabata grita, kendenan ayera a trata drenta Palasio presidensial.
Múltiple negoshi ta será i labornan na e kapital Port-Au-Prince ta sigui paralisá.
Ayera, kaskonan blou a lansa balanan di rùber i gasnan lakrimógeno kontra manifestantenan pa plama nan for di otro i a kousa heridanan na dos periodista: un fotograf i un kamarógrafo.
Tambe otro kuater persona a resultá heridá, di akuerdo ku registronan di hospital públiko di Port-Au-Prince.
E manifestantenan a tira piedranan kontra edifisio di Gobièrnu i ta’tin tirunan ku armanan di kandela, konfrontashonnan i intentonan di vários hóben pa tumba bareranan di entrada di e Palasio presidensial.
Funshonarionan a hasi yamada na e habitantenan pa mantené trankilidat, miéntras e personanan ku ta protestá a eksigí renunsia di Presidente haitiano René Preval.
Presidente Preval a yega na poder dos aña pasá ku e promesa di restourá pas den un pais ku ta sufri di violensia di e lucha entre gruponan rival.
A kere ku Preval tabata den Palasio presidensial na momentu di e protestanan.
For di siman pasá e movementu sosial a eksplotá p’e preisnan haltu di alimentonan asina importante manera entre otro aros.
Segun informashonnan ofisial, e protestanan a kousa 5 morto i a heridá mas ku 40 persona den ménos ku un siman.
Na Haiti, un di e paisnan mas pober di mundu, kaminda e poblashon ta biba ménos ku 1 dollar pa dia, e malkontentu kousá pa oumento di preis di alimentonan ta menasá desestabilisá e demokrasia frágil.
Presisamente ayera, Hefe di Mishon di Nashonnan Uní pa Stabilisashon di Haiti (MINUSTAH), Hedi Annaba, a afirmá na Konseho di Seguridat di Nashonnan Uní ku situashon na Haiti ta ekstremadamente frágil pa instabilidat sosio-ekonómiko ku e pais ta pasando aden.
9.000 Miembro di MINUSTAH ta desplegá na Haiti for di 2004.
A manda e mishon pa kaba ku e káos ku a sigui despues ku a tumba eks Presidente Jean-Bertrand Aristide, e promé mandatario eligí demokrátikamente.
Siman pasá a ataká dependensianan di e mishon di Nashonnan Uní na sùit di e pais, un echo ku a risibí kondena di parti di Konseho di Seguridat.

Foto; Haiti manifestantenan 0904

Manifestantenan ta kore ora sòldánan brasileño ta yega pa plama e protesta for di otro dilanti Palasio presidensial na Port-Au-Prince.

Foto: Haiti protesta 0904

Manifestantenan ta kore pa tirunan dilanti Palasio presidensial na Port-Au-Prince.