WILLEMSTAD - Diputado di Enseñansa Marilyn Alcalá-Wallé tin mester di sigur dos siman di tempu pa kontestá tur e preguntanan ku miembronan di Konseho Insular a lansa ayera, durante e reunion públiko di Konseho Insular ku a trata inovashon di enseñansa.
Komo tal, gezaghèber interino Magaly Jacoba a posponé e reunion despues di promé tanda te dia 23 di aprel awor pa 2’or di mèrdia.
Parti di e kontestanan, segun e mandatario, e por duna dia 23 awor, sobrá kontestanan e lo duna despues di e konferensha grandi di enseñansa ku ta programá pa dia 23 di mei próksimo, asina Alcalá-Wallé a agregá.
Motibu di e reunion públiko di ayera, pidi pa Partido Pueblo Soberano i partido Demokrat ta sierto deklarashonnan ku diputado Alcalá-Wallé a hasi algun dia pasá riba inovashon den enseñansa.
Alcalá-Wallé a indiká, ku tin sierto parti di inovashon ku no a duna e resultado deseá i ku mester bai kambia esaki. Hopi ta esnan ku a interpretá e palabranan aki ku gobièrnu tin pensá pa para e proseso di inovashon den enseñansa, loke e mandatario despues a rechasá kategórikamente. Mi ta para shen porshento tras di inovashon. Loke a pasa ta, ku implementashon di e inovashon no a kana manera mester ta, el a aklará.
Esei tabata punto sentral tambe di e diskushonnan di ayera.
Miembronan di Konseho Insular ayera a presentá un avalancha di pregunta na gobièrnu riba e tema aki.
Konseho Insular tabata práktikamente unánime den su punto di salida, ku falta masha, masha hopi informashon ainda riba tantu e proseso di inovashon den enseñansa, komo e inovashon riba su mes.
Hopi hende ni sikiera ta komprondé ta kon e sistema nobo ta hinká den otro. Komunidat a konosé durante hopi aña largu e situashon di enseñansa básiko, enseñansa avansá pa despues sigui pa enseñansa akadémiko. E forma ku a kambia e struktura ainda tin hopi hende konfundí, asina miembronan di e diferente frakshonnan den Konseho Insular, tantu di koalishon komo di oposishon a trese dilanti.
Kisas si nos por a trese un komparashon entre e sistema bieu i kon esaki ta komparabel ku e struktura nobo, e ta bira mas komprensibel pa pueblo, asina Gisette Seferina, miembro di frakshon di Partido Nashonal a duna di konosé.
Renfred Rojer di frakshon di Frente Obrero tambe a enfatisá e importansia pa duna mas informashon pasobra en bèrdat, asina el a atmití, ta eksistí hopi konfushon awor aki riba e sistema nobo.
Diputado Marilyn Alcalá-Wallé, antisipando riba su kontestanan aki dos siman a bisa, ku despues di e konferensha grandi na mei awor, lo bin klaridat den ki direkshon gobièrnu lo sigui kana ku e proseso aki.