WILLEMSTAD - Ta imposibel inová bo sistema di enseñansa, si bo no inová bo sosiedat, si bo no krea oportunidat igual pa tur hende. Manera e situashon ta awor aki, ta un farse kompleto, Nelson Pierre, lider di frakshon di Lista Niun Paso Atras a bisa ayera den Konseho Insular di Kòrsou durante e reunion públiko pa papia riba inovashon di nos enseñansa.
Pierre, manera kasi semper ta e kaso, a aserká e problemanan ku ta manifestando den e proseso di inovashon den enseñansa for di un punto di bista filosófiko.
Pierre a bisa, ku istórikamente situashon a krese den mayoria parti den mundu, ku ta papia di igualdat pa tur hende – tambe den enseñansa – siendo ku den práktika esei no ta e kaso.
Tur tempu a papia di krea oportunidat igual pa tur hende subi riba e trapi di progreso den bida. Pero den práktika, nos ta weta otro kos ta sosodé. Mundu a krese basá riba e sistema aki.
Ta p’esei por ehèmpel movementu iskierdista ta kresiendo na Fransia. Pero na Ulanda nos ta weta un otro tendensia. Un figura ultra derechista ku ta kere ku e por trapa derechi di siudadanonan igual den mesun Reino, ta hañando dia pa dia mas popularidat. Ulandesnan ta mal hende. Mal hende mes, Nelson Pierre a enfatisá.
Ta un hecho segun Pierre, ku e tendensia neo liberal ketu bai ta sigui dominá den mundu.
Si nos analisá nos enseñansa, nos ta weta ku no tin un ehèmpel mas klásiko di desigualdat.
“Na skol e maestro ta bisa e mucha kòrda bin skol na tempu, sino nos ta sera porta di skol. Ku kua sèn e mucha ta paga bus bin skol? Kòrda hinka rudia i resa anochi den kamber. E mucha no tin ni kas, kòrda kamber. Kòrda ku e informashon ku bo mester pa traha bo tarea, bo ta hañ’é riba Internèt. E mucha no tin ni kòmpiuter, te pa e tin Internèt.
Ta den e situashon aki nos ta bibando awendia. Anto nos ta papia di chèns igual pa tur mucha den enseñansa?” Nelson Pierre a puntra.
Pierre a bisa ku ta un realidat ku den e mundu aki no ta eksistí igualdat pa tur hende.
“Si bo pretendé ku bo ta bai hiba un maneho di inovashon di enseñansa, anto bo limitá esei na enseñansa so, bo no ta bai logra.
Inová enseñansa, sin inová bo sosiedat, no ta e solushon.
Bo mester krea mihó oportunidat pa tur hende. Mester tin kas pa tur hende, mester tin areglo sosial na drechi pa esnan di ménos rekurso, mester tin un sueldo mínimo ku bo por biba for di dje, un ònderstant ku un hende por sobreviví. Ta solamente kumpliendo ku e kondishonnan básiko aki, nos por krea un sosiedat kaminda tin igualdat pa tur hende, inkluso den enseñansa,” Nelson Pierre a finalisá bisando.