WILLEMSTAD - Mi ta kontentu pa un kos: tin tur indikashon awor ku komunidat ta konsiente ku nos ta bibando den un krísis energétiko, kaminda tur hende mester duna un man pa nos sali afó.
Esei ta reakshon di diputado di Asuntunan Ekonómiko Eugène Rhuggenaath, riba último desaroyonan den e sektor aki.
Gobièrnu di Kòrsou a posponé introdukshon di un oumento di preis di gasolin – por sierto e di dos den dos luna di tempu – ku 11 sèn pa liter.
A posponé esaki, pa duna un plataforma di sindikato, komersio i gobièrnu mes chèns di presentá alternativa riba e oumento aki.
E komishon a reuní durante último simannan i pa mas tardá mañan djaweps mester entregá nan relato final na gobièrnu.
Ayera, e komishon den forma verbal a duna un indikashon kaba den ki direkshon nan ta pensando ku nan alternativanan. Muchu detaye di e rekomendashonnan aki sinembargo te ainda no ta konosí.
Pero banda di e komishon aki, Partido Niun Paso Atras tambe a entregá un análisis ku el a hasi riba e situashon di preis di energia na Kòrsou.
E partido, presidí pa Carlos Monk a konkluí ku debidamente tin espasio pa mantené e preis di kombustibel na e nivel aktual, basta tuma paso riba kuater área di atenshon, ku ta entre otro e área sosio ekonómiko i e área di legislashon.
E grupo ta proponé entre otro pa evaluá un restrukturashon di Curoil komo distribuidor di kombustibel. Den e restrukturashon aki no ta mishi ni ku rentabilidat, ni ku puestonan di e trabou di e kompania, segun Monk a sigurá.
El a bisa ku e rapòrt ku nan a entregá ta kontené mas elemento ku di ta importansha pa garantisá un stabilidat den sektor energétiko, entre otro, buska aliansa ku Petrocaribe.
Diputado Eugène Rhuggenaath a bisa, di ta kontentu ku e desaroyo aki.
“E loke nos ta mira ta, ku komunidat ta birando konsiente ku e problema di energia ta un problema serio ku ta afektá nos tur. E ta afektá nos den nos bida diario i mi ta hopi kontentu ku mas i mas, por nota un interes den komunidat pa aportá na un solushon pa e problema aki,” Rhuggenaath a bisa.
E intenshon ta pa próksimamente trata e relatonan aki den reunion di Bestuurscollege pa tuma un desishon kon ta bai sigui kana, el a añadí.