WILLEMSTAD - E moshon ku parlamentu ulandes a aseptá siman pasá, ta un kos ku fásilmente por kondusí na aktuashon ilegal di parti di gobièrnu ulandes. Si ehekutá e moshon aki, gobièrnu ta haña un base pa ekspulsá antianonan for di un pais den Reino, loke ta kompletamente ilegal. P’esei MAAPP lo vigilá e desaroyo aki djaserka, presidente dje organisashon ku ta agrupá organisashonnan ku ta sali na defensa di antianonan na Ulanda Rub Severina a sigurá.
Severina tabata referí aki na e moshon ku Tweede Kamer a aprobá ku un mayoria grandi.
E moshon ku ta boga pa manda hóbennan antiano, ku no tin niun klase di perspektiva den nan bida, pero ku en kambio ta formando problema serio riba teritorio ulandes, bèk Antia.
Parlamentu ulandes a aprobá e moshon aki ku un sosten amplio di partidonan polítiko, inkluso di partidonan manera Partij voor de Vrijheid ku tur tempu tabata na fabor di un medida asin’aki.
E moshon ta basa riba e punto di salida, ku tur mucha ku ainda ta bayendo skol i tur mucha ku ta kai bou di e proyekto Formashon Sosial Obligatorio lo no por drenta Ulanda. Lo hasi eksepshon solamente serka hóbennan ku ke establesé na Ulanda pa sigui studia òf ku nan famia kompleto a muda pa e pais friu.
Ku esaki, a habri kaminda pa tòg introdusí un lei den futuro, ku ta hasi posibel ekspulsá hóbennan antiano, un deseo ku ta biba na Ulanda ya pa basta tempu kaba, asina Ruben Severina a atmití.
For di momentu ku partidonan polítiko PvdA i CDA a presentá e moshon siman pasa, tabata evidente ku e biaha aki si, lo no tin problema pa e pasa. E moshon a ser presentá pa Jeroen Dijsselbloem di PvdA i Madeleine Toorenburg di partido CDA.
Severina a bisa, ku ta masha importante pa sa awor kiko gobièrnu ulandes ta bai hasi, esta si nan ta ehekutá e moshon aki.
Severina a ripití ku punto di salida mester keda ku un siudadano di un di e paisnan den Reino mester tin e posibilidat pa move libremente den Reino.
Si bini ku un medida asin’aki, e ta un menasa serio pa sosiedat.
Un otro punto interesante ta, segun e presidente di MAAPP kiko ta bai hasi den kaso di Aruba. E moshon ta papia di hóbennan arubiano tambe. E medida ta basa riba e hecho ku tin un sistema di enseñansa obligatorio i ku tur mucha ku tin edat di bai skol, mester ta den skol tambe. Na Aruba no tin enseñansa obligatorio. Kiko esaki ta nifiká pa nan? E ta nifiká ku nunka mas nan por bai Ulanda? Severina a puntra.
Severina a lamentá ku hustamente un eksponente di su mes partido, PvdA ta un di esnan ku a entregá e moshon. El a atmití di a keda sorprendí ku Dijsselbloem a bin ku e moshon aki. Mi ta sigui karga e speransa ku minister Ernst Hirsch Ballin, ku ta konosí pa su konosementu riba tereno di derechi humano, ta weta e inhustisia den e areglo aki.
“E asuntu di ekspulshon di antianonan ta un asuntu masha ferfelu i sensibel. E relashon entre Antia i Ulanda semper tabata karakterisá pa difikultat. Ku un desaroyo asin’aki, bo por haña bo ku e kos ta bira mas difísil ainda, ku konsekuensia ku kosnan ta kana ménos rápido.
Nos mester wak e asuntu aki hopi bon,” Severina a duna di konosé.
E no ta kompartí e pensamentu ku ta hinkando demasiado energia den e asuntu aki.
Mañan por sierto tin apelashon di e kaso kaminda ta trata introdukshon di e banko di informashon pa antianonan, e asina yama Verwijsindex Antillianen (VIA). Manera ta konosí, organisashonnan antiano a hiba gobièrnu ulandes dilanti i gobièrnu ulandes a pèrdè e kaso. Mañan ta trata e kaso aki den apelashon. Nos tin speransa ku lo bolbe rechasá e intenshon aki den korte di apelashon tambe, Ruben Severina, presidente di MAAPP a agregá.