ORANJESTAD - Departamento di Asunto Social (DAS) conhuntamente cu Departamento di Labor y Enseñanza pa Empleo ta start e di cinco programa di reintegracion den sector laboral den e distritonan di Aruba entrante 9 di april 2008. Un total di 70 persona ta participa na e programa aki cu tin como meta principal e reintegracion di clientenan cu ta cobra onderstand, den e sector laboral. Ademas ta promove un calidad di bida mas halto dor di evaluacion di motivacion y circumstancianan di bida di e clientenan
Na aña 2004 a inicia cu e programa aki cual ta conta cu un exito rotundo. E efectonan te na e momentonan aki ta asina grandi cu hasta ora cu no logra haya un trabou e participante ta keda activo y ta haci mas esfuerzo pa sali for di bijstand y haña trabou pa asina independientemente sostene nan mes y nan famia. Durante e añanan a sa di evalua y restructura e programa cu e meta pa hisa e calidad y efectividad di e programa den su totalidad.
Un di e cambionan cu a tuma lugar ta e introduccion di workshops den e programa den cual tanto expertonan interno como externo ta duna e participantenan e conocimento y siña abilidadnan relata na motivacion, salud, comunicacion, presupuesto personal, solicitud di empleo y mas. E mayoria di participantenan ta hende muher cual tambe ta refleha e mayoria cu ta ricibi onderstand.
E programa di reintegracion ta promove e balor propio, forza y independecia di e cliente y alavez ta crea un red di sosten bou di e participantenan den cual nan por keda apoya otro. Di e forma aki tambe ta aporta na un reduccion di gastonan pa gobierno dor di baha e cantidad di personanan riba lista di bijstand.
Ta importante pa e participante siña tuma decisionnan den su bida cu ta yude haya y mantene un trabou y alavez crece tanto personalmente como profesionalmente. Den e programa participantenan ta ricibi un guia di consulentenan di trabou di Departamento di Labor cu ta yuda nan haya un trabou cu ta pas cu nan persona. Ademas ta pone atencion riba aspectonan personal di e participante y tin posibilidad pa haya guia individual dor di un trahador social di DAS.