Nan tin hamber y sed pa poder pero mas bien ta hamber y sed pa famia

ORANJESTAD- Gobierno di MEP pa medio di un comunicado di prensa, a dal e clabo riba su cabez, esta cu sindicatonan ta “muriendo di hamber y sed.”
Segun Gobierno ta hamber y sed pa poder pero en realidad e palabranan usa pa Gobierno, ta cuadra net den e lucha cu e sindicatonan ta hibando, esta cu placa no ta yega y cu nan ta luchando pa hamber y poder.
“Tin cierto mal elemento cu nunca a haci algo positivo pa e pais aki y ta contra tur cos bon pa e pueblo Arubano. Nan ta biba di instiga y manipula otro hende cu e unico meta pa distrui economia di nos pais. No lubida cu te awe esnan cu mester a investiga con e placa di SEPPA a ser malgasta, nan tur a ser saca for di e sindicato, algo similar manera tempo a cumpra e rancho pa masha hopi placa sin cu nunca a duna cuenta na e miembronan. Laga nos no papia mes con a anda cu e credit union di SEPPA cu hasta Banco Central mester a interveni pa e manera iresponsabel di anda cu placa di e miembronan.
E manipulacionnan cu a tuma lugar pa haci un hende cu no ta ambtenaar bira Presidente di SEPPA ta algo serio, unda e manera cu a core cu e Presidente e tempo ey ta algo di e mente di esun cu ta tras di e huelga actual y tambe e plan diabolico pa perhudica henter un pais su economia cu seramento di nos Aeropuerto.
Kico comunidad por spera di un dirigente di SEPPA cu den e ultimo eleccion a perde tur clase di credibilidad como politico, ya cu su partido PPT a obtene apenas 131 voto y su persona como lider di e partido aki 57 miserable voto riba su nomber? Con un Arubiano cu nunca a haci algo bon pa nos economia por coopera pa trata cu ningun avion baha 6 ora largo pa dia durante ‘peak hours’ na Aeropuerto ta, pasobra e ta odia e 42.000 otro empleadonan den nos hotelnan, taxistanan, carrentals, restaurantnan, companianan di watersport, companianan di transporte, e ‘sea and air package’ di viaha cu avion pa despues bay cu trip ariba crusero, ta muestra di un mal elemento frustra cu no ta importele e consecuencianan. Cuanto aña largo henter comunidad y gobierno a traha pa trece turista nos isla pa den un paar di dia nos laga hendenan iresponsable caba cu tur cos. E manera di uza Cuerpo di Bombero pa huelga pa laga Aeropuerto casi sin hende pa cumpli cu e condicionnan di I.C.A.O. ta condenable. Cu abo cu pensioen di gobierno como ambtenaar y pensioen di viejez kier huelga ta bo bon derecho, pero ora cu esaki tin metanan pa caba cu nos pais ta algo hopi peligroso.
Gobierno ta gasta mas cu 30 miyon florin di pueblo pa aña pa promove nos isla, e hotelnan, taxi, restaurant, carrental, tourbusnan, companianan di watersport, comercio en general tambe ta gasta hopi miyones di florin pa trece turista nos isla, anto e manifestantenan cu no ta ser huzga a base di productividad pa haña promocion cu 3 luna liber pa aña, bay di oficina henter ora, busca yiu na school, bay entiero sin cu e ora ta ser kita for di vakantiedagen, bay den exterior pa deporte cu pago, mescos ora di hiba un familia den exterior, ainda kier sera e ader mayor di nos pais, esta nos Aeropuerto. Foei, anarkistanan!
Nos pueblo no por laga un grupito di sindicalista - cu a perde tur nocion di realidad y cu a nenga 5 proposicion di gobierno, cu ta haña na Januari Bashi uitkering di Af. 500,00, un luna di prima di vacacion na Juni, Gelijk bedrag di Af. 1250,00 na November, bonus di Af. 200,00 na esnan cu ta bin na remarca – pa e grupito aki masacra e economia di nos pais. Kico mas e anarkistanan kier haci pa caba cu nos economia?”