WILLEMSTAD – Awe dia 10 di aprel, e ekipo di beisbòl Wildcats ta kumpli 42 aña di eksistensia.
Tabata riba un dia manera awe na 1966, ku kuater ekipo di beisbòl a forma un solo ekipo.
Tabata trata aki di BBC Sugar Kings, BBC Koraal Specht, BBC Red Birds i BBC Altamira Braves.
Un echo notabel tambe ta ku tur e hungadónan tabata prosedente di barionan di Dominguito, Janwe, Koraal Specht Korporaal, Marie Pampoen, Steenrijk i besindario.
Despues ku e ekipo a hunga sinku aña den Klase A, na 1971 BBC Wildcats a promové pa klase AA ku un historia ku ta papia pa su mes.
E hazañanan di BBC Wildcats a kuminsá na aña 1974, despues ku e ekipo a sali na di dos lugá.
E interes di públiko pa loke ta trata weganan di BBC Wildcats a oumentá i e organisashon a sigui krese.
E ekipo di beisbòl aki tabatin su propio agrupashon musikal ku tabata toka na su weganan.
Na 1975 e ekipo di Wildcats a sa di pone fin, pa loke ta kampionato di Kòrsou, na Royal Scorpions, konkistando e título máksimo di beisbòl lokal.
Tambe hopi ta kòrda e weganan memorabel pa loke ta trata Kopa Antiano ora ku BBC Wildcats tabata topa ku ekiponan di Aruba, sigur un ekipo manera Marlboro, kaminda tabata hunga serinan aki na Kòrsou i Aruba.
E aña aki BBC Wildcats ta hasi no ménos ku 37 aña den beisbòl AA i den e 36 añanan anterior, BBC Wildcats a titulá kampion di Kòrsou na 13 okashon ku ta un rekòrt den era moderno di beisbòl lokal.
Na e momentunan aki BBC Wildcats tin e rekòrt di ocho aña konsekutivo kampion di Kòrsou, di 1994 pa 2001, di kua shete bou di maneho di Renato “Nato” Anastagasti.
Spònsernan:
Di 1966 pa 1972 BBC Wildcats a yega na su fondonan mediante di fundraising i donashonnan personal. For di 1973 te ku awe e ekipo a konta ku diferente kas komersial prestigioso ku a spònser e ekipo.
BBC Wildcast a konosé e siguiente spònsernan: Na 1973 Petromar di Petromar BV, di 1974 te ku 1978 Felipe II di Licores Lodewijks, di 1979 te ku 1982 Something Special di J.A.J. Sprock NV, di 1983 te ku 1984 Honda di Japan Motors, di 1985 pa 2000, Banco di Caribe, di 2001 te ku 2002 Dewars White Label di Licores Maduro, di 2003 te ku 2005 Kooyman i di 2006 te ku 2007 Kambes/Amstel.
Pa 2008 i futuro BBC Wildcatrs lo tin un spònser nobo i esei lo ta e prestigioso empresa di seguro FATUM.
Pronto e empresa FATUM lo organisá un konferensha di prensa, kaminda lo ta informá mundu kompletu di 2008 lo ta e aña di FATUM den diferente ramo di deporte, inkluso beisbòl.
E empresa Kambes tambe ta ku Wildcats den 2008.
Direktiva di BBC ta manda un palabra di pabien na tur hungadó, pero tambe èks hungadónan di BBC Wildcats. Tambe pa e fanátikonan di e ekipo ku ta sigui desaroyo di nan ekipo.
Den e próksimo dianan BBC Wildcats FATUM lo laga públiko di Kòrsou sera konosí mas di aserka ku su hungadónan ku den e próksimo kampionato lo sa di defendé e espíritu di un Wildcats riba tereno.