Skina di Sorti, awe djaweps 10 di aprel di 2008, ta kuminsá ku deseá tur hende un bon dia. E úniko aserkamentu polítiko, ku ta kondusí na sosten duradero, ta esun kaminda ta profilá komo un alternativa real di gobernashon. Tur lokual bini aserka ta nada mas ku lokual nan ta yama atributonan relashoná ku rivalidat. Den merkadeo nan ta papia di e “core product”, ku ta esensia dje produkto i “augmented product” ku ta e produkto manera e ta wòrdu presentá na e potensial kliente.
****
Diverso produkto, al final di kuenta ta wòrdu kumpra pa sirbi un propósito ku ta basta leu for di e lokual su funshon esensial ta. Fragansia por ehèmpel, den e kompetensia entre rivalnan den un segmento di merkado, ta wòrdu presentá komo un atributo pa mehorá e “self esteem”. Pa por partisipá den e kontienda e lokual ta wòrdu presentá mester hole. Despues ta bini kestion di marka i empake.
****
Den kestion di gobernashon, esensia di e produkto ta keda solushon di inkomodidat di miembronan di komunidat. Meskos ku den merkadeo komersial, bo por bai pa un nesesidat general òf por bai pa un sierto sektor òf un grupo di sektor. Den strategia komersial nan ta papia di karga un surtido amplio (hopi sorto di produkto) i surtido profundo (tur produkto pa un nesesidat spesífiko). Den polítika tambe bo por spesialisá òf bai pa kubri tur disiplina.
****
E diferensia entre polítika i e kuadro komersial ta ku kaminda den e kuadro komersial e forsanan ku ta influensiá e prosesonan ta mas suheto na influensianan sosio sikológiko. Rivalidat entre partido i denter di partido, fasilitadornan, elektorado, mobilisadornan no polítiko i eventual aktornan nobo, tur ta ménos kalkuladó den nan motivashon ku den e kuadro komersial.
****
E mero echo ku e transakshonnan den e kuadro komersial tin konotashon direkto ku plaka i produkto tangibel ta dikta e aspekto rashonal di ta mas presente ku den e kuadro polítiko kaminda, transakshonal ta mas tantu den e aspekto sosial. Konfiansa, afekshon, i kerensha ku ta elementonan di peso den prosesonan polítiko, tradishonalmente ta wòrdu aserka parotin apesar ku e genio Max Weber a mustra ku nan por wòrdu aserká di un forma rashonal.
****
Partidonan na Antia, masha poko ta sondiá e tendensia di komportashon denter di komunidat. Nan ta konsentrá riba sondeo di popularidat i eventualmente kiko por ta e determinantenan dje popularidat. Pero pa fiha un maneho, lokual ta importante ta e prioridatnan, e disposishon mental i tendensia di reakshon. Pa plantiá un strategia polítiko, aspektonan di popularidat no ta e indikadónan mas adekuado.
****
Hopi bia formuladornan di maneho, ta trompeká riba un di e prinsipionan básiko den formulashon di strategia, ku ta bisa ku bo ta traha den direkshon di un situashon deseá, pero ta sali for di e realidat di momentu. Demasiado bia ta formulá maneho, saliendo for di e persepshon di un komportashon humano deseá. Te ainda hopi pretenshon di maneho (“beleidsintenties”), ta sali for di suidadano ku komprenshon pa gobièrnu su eskohonan.
****
En realidat e punto di salida mester ta, suidadanonan ku un seri di inkomodidat (“behoeften”), pa kual e ke mira solushon segun su lista di prioridat. Na momentu ku un inkomodidat keda atendé, e siguiente segun e lista di prioridat ta primi pa solushon. Partisipashon na diskushon riba diferente asuntu por lo general no ta nada mas ku kumplimentu ku e deseo pa forma parti di un òf otro grupo sosial.
****
Ta p’esei, te hasta entre esnan ku ta miembro di un partido (esnan mas fanátiko inklusive), tin malkontentu ta brota òf biba bou di kueru kontra di gobièrnu (entre otro esun ku nan partido ta partisipá den dje), ku e personanan konserní ta pusha manda mas abou riba nan lista di prioridat pa motibu di e relashon emoshonal ku nan ta mantené ku nan partido. Nan ta krea esküs pakiko nan inkomodidatnan no por wòrdu akomodá dor di e gobièrnu di nan partido.
****
Pero asina ku surgi ribirishi denter di partido, bo ta kuminsá haña formashon di grupitu entre kual esnan ku ta sali for di e esfera di hecisera (“betovering”) di partido, lider polítiko òf favorito den partido i ku bou di e preshon di nan inkomodidatnan real ta kue direkshon di porta. Entre esakinan bo ta bai topa vários ku lo ta den promé fila di partidonan ku ta profilá kontra di nan èks partido, lider polítiko òf favorito.
****
Mi ta splika esaki, pa enfatisá ku te hasta liderazgo di tendensia karismátiko, no por keda muchu tempu sin atendé ku prioridatnan real di un komunidat. Pa PAR e asuntu di DOK, por resultá den inisio di un kaida aparatoso. Mi ta ripití un biaha mas, ku si komunidat por a bira lomba pa Maria Liberia-Peters, e por bira lomba pa kalke otro polítiko den un frega di wowo. Un kaida aparatoso di Emily de Jongh-Elhage, ta lokual pais no tin mester awor aki.
****
Tin retonan grandi ta bini den nos direkshon (apesar ku mayoria ta ignorá òf ninga nan), i tin un vakuo grandi pa lokual ta alternativa real di gobernashon. Pa buena marcha mi ta bolbe splika ku matemátikamente semper bai bo por yega na un otro koalishon mayoritario. Pero esei no nesesariamente ta resultá den kambio den maneho (historia resien di polítika na Kòrsou ta proba mi ponensia).
****
Ta masha hopi koalishon tabata tin, ku partisipashon di tur e partidonan establesé (mas ku 5 aña di eksistensia) den diverso kombinashon, sin ku por mustra riba kambio signifikante den maneho. E mesun direkshon, dinámika i dimenshon, pero ku diferensia den komportashon gubernamental. Awor por kuminsá duda te hasta si tin diferensia signifikante den e komportashon gubernamental.
****
Tin hende ta pensa ku mester papia di mas òf ménos vèrnis pa kubri e mesun intenshon pa sirbi interesnan aheno na esun general. Ami ta preferá di bisa ku tin muchu mas aserkamentu oportunista den e práktika polítiko. Pa kolmo esnan ku aserkamentu oportunista ta haña influensia eksagerá den partido.
****
Un di e bentahanan ku e relashon estatal nobo lo trese ta un partidonan lo tin di sefta. E puestonan ta bira ménos i dirigentenan lo mester bai tuma desishon ku tal bes nan a bini ta posponé. Ami ta kere ku lo ta un bon momentu pa hasi un reflekshon profundo. Fiha ophetivonan nobo. Trasa un plan stratégiko i determiná kual ta e tipo di aktornan ku ta deseabel.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.