LIMA, Perú, - Sinku turista franses a muri ayera na Perú, ora e avioneta den kua nan tabata biaha pa bula riba e lineanan famoso di Nazca a kai, unidat di bombero i polisnan a informá.
E avioneta, di kua e pilot tabata e úniko sobrebibiente, tabata regresá Aeropuerto di Nazca, i pa un fayo mekániko a dal kontra muraya di un edifisio den konstrukshon pegá ku e terminal, segun polisnan.
“Tin sinku víktima franses”, un agente di polis di karetera di Nazca a bisa Reuters.
“A informá ku efektivamente sinku franses a muri. Kuater dama i un hende hòmber”, Angela Soser a bisa di su banda, kende ta asistente di gerensia AeroIca, empresa propietario di e avioneta, ku plachi di number OB-1266, ku a kai riba tera.
Na kabamentu di mart di e aña aki, un otro avioneta ku sinku turista franses a realisá aterisahe di emergensia na Nazca, sin kousa víktima, segun polisnan.
“Nos tin informashon ku e pilot di e avioneta, identifiká komo Carlos Bartra, ta na Hospital di Nazca, kaminda e ta rekuperando”, Sonia Vega a bisa di su banda, kende ta supteniente di unidat di bombero di Nazca, na region di Ica, situá sùit di e pais.
E echo a okurí na altura di kilómetro 453 di Panamericana Sur na Palpa, i n’e lugá a yega personal spesialisá di “Corporación Peruana de Aeropuertos y Aviación Comercial” (CORPAC) pa investigá motibunan ku a motivá e aksidente.
Di nan parti, outoridatnan a sera e zona pa evitá personanan straño yega serka i bai n’e lugá kaminda e avioneta aksidentá ta.
Miéntras tantu, Hefe di “Policía de Carreteras”, koronèl Guillermo Arteta, a bisa ku e avioneta aksidentá a hañ’é ku problema ku algun kabel di tenshon haltu, p’esei el a desviá su rumbo.
Tambe el a hasi menshon ku a tuma kontakto ku Embahada di Fransia na Perú pa informá di morto di sinku siudadano franses, ku e meta ku por repatriá restunan mortal di e víktimanan pa nan pais di orígen pa dera nan.
E lineanan di Nazca, situá mas o ménos 400 kilometer sùit di Lima, ta dibuhonan enorme ku solamente ta visibel for di aire.
E lineanan mas famoso di Nazca, deklará Patrimonio Kultural di Humanidat pa UNESCO na 1994, tin entre otro figuranan di un araña, un kolibrí, un makaku i un hòmber.
Ekspertonan ta afirmá ku a pinta e dibuhonan durante kultura Nazca (200 aña promé ku Kristu), promé ku sivilisashon Inca.

Foto: Peru avioneta kai 1004

Polisnan di Perú ta traha n’e sitio kaminda e avioneta a kai na Nazca.

Foto: Peru avioneta kai 1 1004

Otro bista di e polisnan peruano ta traha n’e sitio kaminda e avioneta a kai. 5 Turista franses na bordo di e avioneta a muri.