Prof. Lorito ta yama tur hende un felis djaweps. Kurpa ta manera mariá awe, pero no tin moda di hasi: Lorito tin ku sigui bula. Tur kaminda e ta bula.
*********
Tin biaha tin sierto kosnan ku nos no ta komprondé. Direktiva di BZV ta haña un zonzá den korte i ta keda na su posishon normalmente. Monk mester bai bèk. Si bo a hasi e asuntu di Monk un asuntu di prinsipio, anto e kos mas mihó ku bo por hasi ta saka bo konklushon.
*********
Mesun kos ta konta pa Direktiva di Skolnan Katóliko ku a haña un derota fulminante den korte pa retiro di Doc Hernandez. Direktiva einan tambe a keda sinta normalmente. Einan tambe ta konta e pregunta kon bin si bo pèrdè un kaso dje mahos ei manera RK a pèrdè, ta di kon e direktiva ta sigui na e puesto normalmente. Asina nos por menshoná diferente ehèmpel mas. Nos kier pa hasi un distinshon si riba desishonnan grandi i di prinsipio i no pa chinchan un desishon.
*********
Nos a tuma nota di e siguiente komunikado di Gabinete di Gobernador via di RVD. De Gouverneur van de Nederlandse Antillen, Z.E. mr. F.M. d.l.S. Goedgedrag brengt op 8 en 9 maart 2008, een werkbezoek aan de Bovenwindse Eilanden en Saba.....Curaçao, 8 april 2008. Tin dos kos ku ta erornan grandi den e partisipashon aki. E fecha ta robes i mester ta 8 i 9 di aprel. E kos mas serio ta ku konstelashon di Islariba a kambia sin ku nos sa mes? Awendia bo tin Isla Riba i Saba. Ta ki dia Will Johnson a saka Saba for di Isla Riba anto?
*********
Lorito a haña un hende mas pa atmirá. Awor ta Jeanette Bonet a hasi impreshon riba nos pa su karera impreshonante di ofisinista te na GM di un hotèl grandi. Esei ta un prueba kla, ku ora bo kuminsá abou esei no ta nifiká ku bo tin ku keda abou. Doña Jeanette a papia palabra kla riba tur asuntu ku tin di aber ku turismo. Asina mester ta! No mester papia ku miedu!
*********
Lorito a pèrdè e hendenan aya for di bista i nos no a komprondé ta di ken. Ayera numa nos a haña kontesta riba e misterio ku a surgi: nan a haña outo nobo. Ta p’esei ni e bisiñanan ni nos por a sigui nan mas di serka. Awor ku nos sa ku nan tin outo nobo, por sierto ku number mal pegá, nos por sigui nan pasonan atrobe. Pronto nos lo duna e siguiente kapítulo.
*********

(foto lorito)

Nèt nan a kaba di pone un webcam riba Hotel Plaza ku huma pretu a sali for di Refineria Isla. Naturalmente tur hende por a sigui e desaroyo aki bibu i direkto rònt mundu. Sigur no ta bon propaganda pa nos turismo. Riba e pòtrèt, kortesia di Iseeyou.com por mira e impakto di e polushon i loke rònt mundu por a mira. Bonbiní!
*********
Lorito ta keda te aki awe. Nos a keda tur na rut ayera ora nos a bai hasi ko’i kaweta na Refineria Isla. Awe nos tin ku bai frega nos alanan pa nos sali ta bria atrobe. Duele pa Refineria Isla ku lo pèrdè algun mion dollar atrobe. Te mañan ku Dios su poder!