WILLEMSTAD – Preisnan a subi ku 0,4 na mart último kompará ku febrüari. Anke ku ta parse ku preisnan di kuminda a subi drástikamente e sifra final no ta reflehá esei no opstante ku preisnan di kuminda a subi remarkabelmente. Loke ta pasa ta ku e sifra final di 0,4 porshento ta resultado di diferente komponente di kua algun a subi i otronan a baha.
Ofisina Sentral di Estadístika (CBS) a bisa ku kompará ku e periodo di e último 12 luna ku e periodo promé ku esei ta resultá ku preisnan a subi ku 3,6 porshento.
Meskos ku último lunanan komestibelnan tabata esun ku a subi mas haltu den preis (+1,9%). Tur e gruponan di komestibel a kontribuí na e subida aki, pero e grupo di manteka i zeta (+4,8%) i di produktonan di lechi (+4,4%) a subi konsiderablemente. Manteka dushi a subi ku 10 porshento mas ku na febrüari, lechi puiru ku 9 porshento i keshi kasi ku 4 porshento. Karni i piská ku un subida di preis di 2,7 porshentu tambe a subi konsiderablemente, prinsipalmente subida di preis di piská a yama atenshon. Preisnan di batata, berdura i fruta (+1,9%) i di sobrá komestibel (+1,7%) tambe a subi debidamente. Sobrá gruponan di komestibel tabatin un subida di entre 0,2 i 1,1 porshento.
Bibida i sigaria a subi na mart ku 1,2 porshento, esaki a ser okashoná prinsipalmente dor di subida di preis di sigaria (+3,2%). Preisnan di rekreashon i desaroyo a subi ku 0,7 porshento, prinsipalmente pa motibu di subida di preis di lèsnan di korementu di outo (+9,5%), kosnan di hunga (+7,5%) i bukinan di estudio (+2,8%). Otro bukinan si a baha (-0,4%). E kategoria di sobrá a subi ku 0,5 porshento, pa motibu ku kuminda di bestia a subi. Preisnan di salubridat (+0,4%), muebel, aparato- i artíkulonan doméstiko (+0,2%) i di bibienda (+0,1%) a subi na mart. Preisnan di paña i sapatu i di transporte i komunikashon a keda igual ku na febrüari.
Inflashon riba término largu
CBS ta bisa ku e promedio di preis durante e periodo di último diesdos luna a resultá na mart 2008 na 3,6 mas haltu ku mart 2007. E sifra aki ta duna segun CBS un bon indikashon di inflashon riba término largu. Ku esaki e tendensha di subida di inflashon ta kontinuá, asina e instituto ta bisa.