Awor ku wes a duna eks-klientenan Money Plan rason

WILLEMSTAD -- Awor ku wes a duna eks-klientenan di Money Plan rason den e kaso ku nan a entamá kontra Ennia, henter e asuntu di klientenan ku a invertí na Kadushi Cliffs tambe a bolbe lanta kabes. Diferente di e hendenan ku a invertí a yama LA PRENSA e siman aki indikando ku te awe nan no a haña un klaridat den e kaso aki. “Probablemente nos lo no haña nos sèn mas, pero nos kier sa kiko a pasa. Te awe niun hende no a bisa nos nada”, asina un di nan a bisa.
Un otro a atmití ku doló na su kurason, manera e mes a bisa, ku el a pèrdè mas ku 100 mil florin den e aventura aki. “Bo por imaginábo ku 100 mil florin ta hopi sèn ku mi por a hinka otro kaminda”, asina e maestro di skol aki a bisa. Algun di e otronan a pèrdè ménos pero nan ta insistí ku e kaso a keda un misterio pa nan te awe. Un di nan a bisa ku e ta kere ku e kaso no a haña klaridat nunka pa motibu di e konekshonnan polítiko di e desaroyadó(nan). Esmas, segun el a bisa, hasta tin hende den prensa a sali perhudiká pero nan no a denunsiá e kaso aki komo ku nan tin bon konekshon ku tantu e desaroyadónan komo nan partido.
E kaso di Kadushi Cliffs realmente no a haña un klaridat nunka. Loke nos sa ta ku e proyekto ambisioso a kosta hopi sèn, promové entre otro pa George Curiel (eks-direktor di Departamentu di Desaroyo di Antia). Despues ku e proyekto a haña problema finansiero, e proyekto a haña un fiansa adishonal di mas ku 30 mion florin ku un garantia di Gobièrnu di Kòrsou. Gobièrnu di Kòrsou a paga e garantia bèk ku hopi doló.
E proyekto ta eksistí ainda pero awor aki ta den man di Jacob Dekker ku a desaroyá e proyekto den loke nos konosé awe komo Kura Ulanda Lodge. Dekker a bisa dia ku el a asumí responsabilidat pa e proyekto ku e no por komprondé kon a gasta asina tantu sèn na e proyekto aki. “Mi no ta mira e invershon bèk den e proyekto aki”, asina Dekker a bisa e tempu ei.
LA PRENSA a puntra esnan ku a sali perhudiká di kon nan no ta reuní pa ainda wak kiko por hasi. Nan a splika ku tabatin diferente reunion, despues a keda di atendé un ke otro pero te awe no a tende nada mas. Loke LA PRENSA por a destilá for di e puntonan di bista ku a bin dilanti ta ku e kaso a laga un smak masha marga atras, den algun kaso un renkor fuerte pa e simpel hechu ku no a duna sufisiente splikashon. LA PRENSA a keda ku e pregunta ta kon lo tabata si e mesun kos a pasa den un proyekto asina grandi ku garantia di Gobièrnu den e tempu aki.

Score: 0.0, Votes: 0