WILLEMSTAD – Esun ku unabes ta pober, mas i mas tin chèns di keda pober tambe. Espesialmente hende muhé, hóbennan i esnan ku un preparashon di nivel abou ta pober. Esaki ta resultado di un investigashon di e sosiólogonan di Rotterdam Peter Achterberg i Erik Snel.
Nan ta konkluí ku den añanan 80 pobresa tabata un fenómeno temporal. Hendenan ku tabata pober, tabata pober durante un temporada kòrtiko. Pero for di añanan 90 mas i mas hende ta keda kologá den pobresa. Si na aña 1984 1/3 parti di pobernan tabata pober durante 4 aña òf mas, na 2002 esaki tabata konta pa mas ku 60% di nan. Den e mesun periodo e porsentahe di pobresa duradero den henter Ulanda a subi di 0,8 te ku 5,5%.
Por papia di pobresa ora un kas no ta disponé di mas ku 60% di e ‘entrada pa kas’ mediano. Segun e midí relativo akí semper tin pobresa, e investigadó Achterberg ta rekonosé. Pa e yega na e konklushonnan di e investigashon, e sosiólogonan a hasi uso di datonan di e ‘Sociaal-Economisch Panel’, ku anualmente entre 1984 i 2002 a hasi enkuesta bou di 5000 kas di famia.

Pobresa na Kòrsou

LA PRENSA ta bai presentá den un próksimo relato otro siman, e situashon di pobresa akí na Kòrsou. Na e momentunan akí e Büró Sentral pa Statistik (CBS) ta preparando pa Senso 2010. Ku e resultadonan di e senso akí por kompará e datonan ku a kompilá durante e último senso na 2001. Ta e intenshon tambe pa yega na un ‘bestaansminimum’ pa asina por disidí kiko ta e mínimo na entrada ku un kas di famia mester pa por hiba un bida humano.