ORANJESTAD– Recientemente a lansa e campaña “Papiamento, cuid’e!”
E campaña aki ta consisti entre otro di diferente material di promocion y informacion. Na luna di januari a publica un kalender di Papiamento pa aña 2008, cu ta Aña Nacional di Cultura y Aña Internacional di Idioma. E kalender a wordo reparti entre diferente grupo meta pa asina anticipa e atencion cu ta bay duna na nos idioma Papiamento durante aña 2008. E kalender ta contene diferente mensahe, citado, lista di palabra y fechanan importante cu ta wordo celebra na Aruba. E iIlustracionnan den e kalender ta enfoca riba e man, formando asina un conhunto cu e concepto y lema di e campaña: “Nos idioma ta den bo man. Papiamento, cuid’e!”
Tur aña riba 21 di februari ta celebra Dia Internacional di Idioma Materno. Na Aruba tambe nos ta pone atencion na e dia aki. Mirando e hecho cu Papiamento ta e idioma materno di mas o menos 70% di hende na Aruba, Departamento di Enseñansa e aña aki a scoge e fecha importante di 21 di februari pa ofrece un charla na su personal tocante e campaña “Papiamento, cuid’e!”.
Na luna di maart a bay publico cu e campaña, haciendo uzo di promocion den corant, na radio y television. Aki, mescos cu riba e poster cu ta wordo reparti rond di Aruba, profesionalnan den diferente ramo ta mustra cu Papiamento ta nan instrumento di mas importante.
Hunto cu e campaña a lansa tambe e website www.papiamento.aw pa por duna mas informacion tocante nos idioma Papiamento. Pa promove esaki entre e hobennan, pronto ta bay reparti algun material di promocion manera pen y sticker na scol.
Reconociendo e papel importante cu diferente grupo meta tin den e proceso pa yuda comunidad conoce miho su idioma Papiamento y asina promove su uzo corecto, Departamento di Enseñansa ta organisando tambe un tayer di Papiamento. E siman aki lo conclui e tayernan interno pa despues sigui cu esnan pa grupo externo.
Ademas di tur esaki, tambe ta trahando riba diferente produccion audiovisual cu tin como meta, duna mas informacion tocante Papiamento na e publico general.
Corda cu “Nos idioma ta den bo man. Papiamento, cuid’e!”