Nos comunidad Arubano a conoce hopi di nos hendenan cu a uza nan talento pa sirbi bienestar general. Nan inteligencia ta(bata) ser uza pa haci cosnan util pa nos pueblo.
Un di e Arubianonan cu desde infancia a uza su tempo pa promove nos cultura, folklore y nos lucha pa nos pais ta completamente autonomo, ta awe den feliz memoria sr. August ‘Juchi’ Croes.
Desde fundacion di nos prestigioso partido Movimiento Electoral di Pueblo (MEP) dia 9 di februari 1971 hunto cu nos lider awe den feliz memoria Betico Croes, un di e personanan clave como su consehero ariba tereno estatal, cultural y folklore ta sr. August ‘Juchi’ Croes.
Tur hende mester por sa cuanto lucha a ser hiba pa awe nos pais tin desde 18 di maart 1976 su propio himno y bandera pa cual sr. August ‘Juchi’ Croes a duna su cooperacion. E tabata forma parti di e prome comision Celebracion di Dia di Himno y Bandera na 1976.
Tempo cu nos pais mester a haci su preparacionnan pa nos tin nos propio ortografia, un di e palancanan como consehero di awe den feliz memoria Betico Croes tabata sr. August ‘Juchi’ Croes, unda al final Eilandsraad di nos isla a acepta e ortografia etimologico como manera pa nos skirbi nos Papiamento. E comision cu a haci e trabao aki tabata tin sr. August ‘Juchi’ Croes como miembro. August tabata tin un stimacion hopi grandi pa nos cultura en general y muy en particular e manera di skirbi nos Papiamento. Varios ta e articulonan cu el a publica ariba e topico interesante aki cu a yuda inculcra den nos pueblo amor pa nos propio identidad cu tabata algo sagrado pele.
Fuera di su carera ehemplar como empleado publico, sr. August ‘Juchi’ Croes tabata hopi activo den su tempo liber den varios ramo educativo pa nos pais.
Sr. August ‘Juchi’ Croes tabata un gran Arubiano cu a stima su pais y su hendenan. Pesey nos di Movimiento Electoral di Pueblo kier a gradici bo pa tur e bunita trabaonan y cu nos Creador por tuma den su Reino.
Na su esposa y yiunan hopi forza den e momentonan dificil aki y cu nos Dios Tata Todopoderoso duna boso hopi forza pa carga e gran perdida aki.

Partido Movimiento Electoral di Pueblo