“Den e matutinonan di dialuna 7 di April 2008, Sr. Paul van Niel, den su calidad di Presidente di OPPA, den un articulo titula “Nos mandatarionan mester tin mas respet pa nos pensionadonan c.q. nos grandinan”, a trece, pa loke ta relevante pa e pensionadonan di Gobierno, lo siguiente pa dilanti. Nos kier cita aki e parti cu ta di interes pa e pensionadonan di Gobierno di loke Sr. Paul van Niel a scirbi den e articulo menciona: “Por a nota tambe cu den e intermediacionnan cu a wordo hiba, semper y cuando nos mandatario, esta nos flagrante Ministro di Finanzas, esta e representante di Gobierno, ta trece condicionnan infactibel y indiscutibel pa e contra partido, mientras cu e mandatario sa bon bon cu esakinan ta responsabilidad completo di Gobierno. Ehempelnan di esaki ta cu segun e mandatario mester kita e “duurtetoeslag” for di e pensioen; bin cu un “franchise” pa esnan cu tin cu baha cu pensioen ainda, pues haci cambio drastico den e ley di pensioen etc etc.”
Como Presidente di OPPA, e organisacion cu ta representa e pensionadonan di Gobierno, Sr. Paul van Niel mester sali na vanguardia y defensa di e pensionadonan aki y no colga na saya di Sra. Magaly Brito. Pa e pensionadonan menciona ta importante tres asunto cu Sr. Van Niel a trece dilanti den su articulo aki den prensa, esta (1) ahuste di nan pensioen na costo di bida; (2) e asina yama “duurtetoeslag” y (3) e asina yama “franchise”. Pa loke ta trata e dos ultimonan aki, esta (2) “duurtetoeslag” y (3) “franchise”, nos di MEP por ta corto. Gobierno NO lo mishi cu esakinan pa loke ta trata e miembronan di OPPA, ni e otro pensionadonan di Gobierno no miembro di OPPA.
Manera Sr. Van Niel ta suppose di sa, “duurtetoeslag” ta un toeslag cu ta wordo paga riba e pensioen, pa asina por yega na un pensioeninkomen, cu ta igual na e percentahe segun e añanan di servicio di e averahe di e salario di un ambtenaar durante e ultimo 24 luna di su servicio, esta e pensioeninkomen aki ta igual na e pensioen cu ta wordo paga door di Pensioenfonds plus e duurtetoeslag cu ta wordo paga door di Gobierno. Manera ya Gobierno a yega di bisa hopi biaha caba, Gobierno no tin intencion di no paga e duurtetoeslag aki na esnan cu ya ta pensionado di Gobierno, esta e.o. e miembronan di OPPA cu Sr. Van Niel ta representa.
Pa loke ta trata Sr. Van Niel su preocupacion cu Gobierno lo bin cu un “franchise” pa miembronan di OPPA, MEP kier trece lo siguiente padilanti. Na e momento aki un ambtenaar cu ta sali for di servicio di Gobierno cu 30 aña di servicio y cu a cumpli 60 aña ta haña un pensioeninkomen di 70% di su ultimo salario promedio y riba e pensioeninkomen aki e ta cobra tambe su pensioen di behez (AOV).